Media

Ana səhifə

Media

Azərbaycan Prezident Administrasiyasının sektor müdiri: “Bütün biznes kapitanlarına məsləhət görərdim ki, Ermənistan-Azərbaycan münaqişəsi məsələsində pauza versinlər”

10 dekabr 2009 09:13 (UTC +04:00)

- Azərbaycan nümayəndə heyətinin bu forumda iştirakının əsas məqsədi nədir? Bu tədbirin əhəmiyyətini necə qiymətləndirirsiniz?

- Bu foruma çox yüksək qiymət verirəm və Azərbaycanın bu tədbirə qatılmasının səbəbi də budur. Rusdilli məkanın mövcud olmadığına dair fikirlərə baxmayaraq, belə bir məkan mövcuddur. Biz hamımız vahid informasiya məkanında yaşayırıq. Və burada kobud şəkildə desək biznes kapitanları – kütləvi informasiya vasitələrinin rəhbərləri çıxış edirsə, onlardan çox-çox şey asılıdır. Əsasən də sabah, yaxın gələcəkdə və uzaq perspektivdə informasiya məkanının ümumi şəklinin necə olacağı.

Bildiyiniz kimi öz çıxışımda qeyd etdim ki, Ermənistan-Azərbaycan münaqişəsində Rusiya yeganə ölkədir ki, nizamlanma prosesində prezident səviyyəsində çox aktiv iştirak edir. Rusiya prezidenti həm Azərbaycan prezidenti İlham Əliyev, həm də Ermənistan prezidenti Serj Sərkisyanla görüşür. Buna görə də bütün biznes kapitanlarına məsləhət görərdim ki, Ermənistan-Azərbaycan münaqişəsi məsələsində pauza versinlər, xalqlara öz aralarında razılığa gəlməyə imkan yaratsınlar, öz intonasiyalarına fikir versinlər. Bu fikrim qəbul olundu, kuluarlarda Rusiya kütləvi informasiya vasitələrinin rəhbərləri bildirdilər ki, bu son dərəcə düzgün yanaşmadır – xalqlara öz aralarında razılığa gəlməyə imkan yaratmaq lazımdır. Çox qısa müddət ərzində Dövlət Duması, 10 gün sonra İctimai Palata Azərbaycan, Ermənistan və Rusiya ziyalıları, media rəhbərləri üçün dəyirmi masa təşkil etmişdilər. Buna görə də biz əlbəttə ki, bu forumda iştirak etməli, iradə nümayiş etdirməli və görüşməliyik. Bizi burada qəbul edir və anlayırlar. Bizi bu gün anlayırlar v anlayırlar ki, artıq bu münaqişəyə son qoyulmalıdır. İndi 80-ci, 90-cı illər deyil, bəzi kütləvi informasiya vasitələri artıq sakitləşməlidir.

Mən burada faktlar topladım və bu faktlar əsasında təklif edirəm ki, media sahəsində çalışan bəzi şəxsləri “persona non-qrata” elan eləmək lazımdır. Mənə yaxınlaşıb, soruşurlar ki, bunu deyəndə nəyi nəzərdə tuturam – onları işdən qovmaq lazımdır? Cavab verirəm ki, yox. Sadəcə KİV rəhbəri həmin adama deməlidir ki, mənim media qurumumda sənə yer yoxdur, çünki sən millətlərarası ədavəti qızışdırırsan. Söz azadlığı var, get internetdə öz saytını aç və nə istəyirsən, yaz, amma mənim reytinqli agentliyimdə yaxud başqa kütləvi informasiya vasitəsində sadəcə sənə yer yoxdur. Hesab edirəm ki, bu praktikanı tətbiq etməyə başlamaq lazımdır.

- Biz hamımız Rusiyanın “Reqnum” agentliyinin timsalında tamamilə qeyri-obyektiv antiazərbaycan isterikasının şahidi olduq. Sizcə bu kimi hallardan qaçmaq və belə hallara yol verməmək üçün nə etmək lazımdır?

- Siz elə bizim siyahıda adı keçən və bu kimi işlərlə məşğul olan agentliyin adını çəkdiniz. Biz bu məsələ ilə məşğul olacağıq. Tamamilə düz qeyd etdiniz – belə kütləvi informasiya vasitələri arasında “Reqnum” agentliyi də var. Bir də “REN TV” kanalını qeyd etmək istəyirəm, bu kanal yuxarıda qeyd etdiyimi dəyirmi masalar keçirilən zaman son dərəcə qeyri-peşəkar hazırlanmış, millətlərarası ədavəti qızışdıran reportaj yayımlamışdı. Başqa KİV-lərdə də belə faktlar var və biz onlarla söhbət edəcəyik.

- Rusiya prezidenti Dmitri Medvedyevin forumdakı çıxışını necə dəyərləndirirsiniz?

- Fikrimcə, Rusiya prezidenti kifayət qədər konkret danışdı. Hətta onun bir prezident kimi deyil, jurnalistlərin həmkarı kimi çıxış etməyi çox xoşuma gəldi. Həmdə qeyd etmək lazımdır ki, Dmitri Medvedyev müəyyən mənada bir ilkə imza atıb – o nəinki öz bloqunu yaradıb, bu bloqda canlı jurnal da yerləşdirib, hansı ki burada insanlar nəinki məktub yaza, hətta bir-biriləri ilə söhbət edə bilərlər. Bildiyim qədər, indiyədək başqa heç kim belə bir addım atmayıb. Buna görə Rusiya prezidentini həm də informasiya texnologiyaları mütəxəssisi adlandırmaq olar, o məhz bu ruhda çıxış elədi. Onun çıxışı çox dolğun, pozitiv idi və hələ uzun müddət müzakirə olunacaq.