Media

Ana səhifə

Media

Vüsalə Mahirqızı: “MDB-nin bir çox ölkələrindən fərqli olaraq Azərbaycanda internet-media çox sürətlə inkişaf edib”

10 dekabr 2009 12:16 (UTC +04:00)

Moskva. Roman Ağayev-APA. “Hesab edirəm ki, bu cür forumlarda iştirak etmək media qurumları arasında inteqrasiyaya kömək edir”. APA-nın məlumatına görə, bu fikirləri Moskvada keçirilən Avropa və Asiya Media Qurumlarının Forumunda iştirak edən APA-nın baş direktoru Vüsalə Mahirqızı jurnalistlərə açıqlamasında söyləyib. O MDB məkanının Azərbaycan mediası üçün yad olmayan məkan adlandırıb: “Biz uzun illər bir yerdə olmuşuq. Mass-medianın, internet-medianın inkişaf etdiyi və inteqrasiya proseslərinin getdiyi bir mərhələdə bizim digər ölkələr vasitəsilə xəbər almağımız, hansısa bir ölkədə baş verən hadisə barədə məlumatı üçüncü ölkənin informasiya agentliklərindən almağımız informasiyanı cəmiyyətə çatdırmaq prosesini gecikdirir. Eyni zamanda doğru informasiya həmişə birinci mənbədən alınan informasiyadır. Buna görə də hesab edirəm ki, bu cür forumların bizim üçün son dərəcə böyük əhəmiyyəti var”.

Vüsalə Mahirqızı medianın hər zaman fikir mübadiləsinə ehtiyac duyulduğu sahə olduğunu vurğulayıb: “Media siyasətin içindədir, amma eyni zamanda media elə bir sahədir ki, burada hər zaman fikir mübadiləsinə ehtiyac var. Məsələn, biz uzun illərdir münaqişə vəziyyətində olduğumuz bir ölkənin - Ermənistanın jurnalistləri ilə belə görüşlərdə fikir mübadiləsi aparırıq. Eləcə də digər ölkələrin təmsilçiləri ilə. Ümumiyyətlə, MDB məkanındakı olan ölkələrin media qurumları ilə aparılan müxtəlif müzakirələrin bir yaxşı cəhəti var - biz nə qədər öndə və nə qədər geridə olduğumuzu görə bilirik. Eyni zamanda bu kimi tədbirlər müəyyən tərəfdaşlıq əlaqələrinin qurulmasına, müəyyən informasiya mübadiləsinə, internet vasitəsilə foto və videomaterialların alqı-satqısına son dərəcə kömək edir”.

Vüsalə Mahirqızı Azərbaycan mediasının acınacaqlı durumda olması barədə fikirlərlə razılaşmadığını deyib: “Hər halda bu gün foruma Azərbaycandan çox yaxşı bir heyət qatılır. Heyətin tərkibinə daxil olanlar televiziyaların, agentliklərin, rusdilli medianın rəhbərləri və təmsilçiləridir. MDB-nin bir çox ölkələrindən fərqli olaraq Azərbaycanda internet-media çox sürətlə inkişaf edib və etməkdədir. Eyni zamanda digər bir məsələ var. Biz bu kimi görüşlərdə həm də söz azadlığının vəziyyətini görürük. Çıxardığımız nəticə odur ki, Azərbaycan söz azadlığı məsələsində digər MDB ölkələrindən o qədər də geridə qalmır. Hətta bu sahədə bəzi ölkələrlə yarışa da bilərik. Bizi Fransa ya İngiltərə ilə müqayisə etmək qüsurlu müqayisədir. Biz MDB məkanında eyni inkişaf yolu keçdiyimiz ölkələrlə müqayisə oluna bilərik. Amma, təbii ki, əgər biz özümüzü Rusiya mediası ilə müqayisə ediriksə, buradan öyrənməli çox şey var”.