Media

Ana səhifə

Media

SAMF qəzetlərin saytlarının monitorinqini aparıb

17 dekabr 2009 01:27 (UTC +04:00)

Bakı – APA. Söz Azadlığını Müdafiə Fondu (SAMF) qəzetlərə məxsus internet saytlarında məlumatların yenilənməsi vəziyyətinə dair monitorinq aparıb. Fonddan APA-ya verilən məlumata görə, monitorinq dekabrın birinci ongünlüyünü əhatə edib.

SAMF-ın əməkdaşları tərəfindən keçirilən monitorinqin məqsədi qəzetlərin internet saytlarındakı məlumatların yenilənməsi ilə bağlı real vəziyyəti aydınlaşdırmaq olub. Kollektiv üzvləri bu parametrləri aydınlaşdırmaq üçün on gün ərzində mütəmadi olaraq gün ərzində qəzetlərin internet saytlarına bir neçə dəfə baxış keçiriblər. Saat 11.00, 13.00, 16.00, 18.30 - 19.00-da. İstifadə olunan internet saytları 31 qəzeti əhatə edib. Onlardan 18-i gündəlik, 13-ü həftəlik dərc olunan qəzetlərdir.

Məlum olub ki, həftəlik qəzetlərin əksəriyyəti çapdan çıxan günün səhərindən etibarən öz materiallarını yerləşdirib növbəti həftə çap olunacaqları günü gözləyirlər. Amma onların 15 faizə qədəri özləri “qaynar xəttlər” yaradıb yeni xəbərləri internet resurslarında yerləşdirirlər. Gündəlik qəzetlərdə isə internetlə işləmə mexanizmi fərqli qaydalarda qurulub. Belə ki, onların 33 faizi səhər saat 10.00-11.00-dan etibarən çap olunmuş yeni materiallarını saytlarında yerləşdirməyə başlayırlar. Bunlar həmin gün qəzetdə dərc olunmuş materiallardır. Saat 13.00-dan etibarən isə 67% media orqanları çap olunmuş materialların internetdə yerləşdirilməsi bütün gündəlik qəzetləri əhatə edir. Bu zaman artıq saytların 18%-də yeni, çap olunmamış informasiyalar görünməyə başlayır. Aparılan müşahidələr zamanı günün sonuna qədər həmin informasiyaların sayında nəzərəçarpacaq say artımı özünü göstərməyib.

Monitorinq nəticəsində o da bəlli olub ki, saytların təşkili də fərqli qaydadadır. Saytların 35-40%-nin yüksək zövqlə hazırlanması da diqqət mərkəzində olub. Qəzetlərin internet saytlarının operativliyə görə 26 faizinin normal, 34 faizinin orta, 40 faizininsə zəif fəaliyyət göstərdiyi qənaəti formalaşıb.

SAMF bundan sonra da mütəmadi olaraq analoji monitorinqləri davam etdirməyi nəzərdə tutur.