Media

Ana səhifə

Media

Azərbaycanda ictimai bilgilərə çatma ilə bağlı illik hesabat hazırlanıb

17 dekabr 2009 10:12 (UTC +04:00)

Bakı. Elnur Məmmədli - APA. Media Hüququ İnstitutu Azərbaycanda ictimai bilgilərə çatma ilə bağlı illik hesabatını açıqlayıb. APA-nın məlumatına görə, institutun rəhbəri Rəşid Hacılı keçirdiyi mətbuat konfransında hesabatın 2009-cu ildə aparılan monitorinq nəticəsində hazırlandığını deyib. Araşdırmanın məqsədi Azərbaycanda bilgi azadlığının durumunu öyrənmək, problemləri müəyyənləşdirib hökumətin bilgi azadlığı istiqamətində səylərinə yardım edə biləcək tövsiyələr hazırlamaq, media və vətəndaşları informasiya əldə etmək azadlıqlarından yararlanmağa həvəsləndirməkdir. O, hesabatın institutun ekspertlər qrupu tərəfindən tərtib edildiyini vurğulayıb.

Hesabatın hazırlanmasında iştirak edən institutun əməkdaşı Xalid Ağaliyev deyib ki, hesabat il ərzində dövlət qurumlarına göndərilən 202-si yazılı sorğu, jurnalistlər tərəfindən ünvanlanmış 200 şifahi sorğu, qanunla bilgi sahibi sayılan 30 dövlət qurumunun internet saytının monitorinqinin araşdırılması və informasiya almaq hüququnun pozulması ilə bağlı məhkəmələrə verilən şikayətlərin araşdırılması əsasında hazırlanıb. Dövlət qurumları 202 yazılı sorğunun 58-nə cavab verib. Cavabların 38-i 7 günlük müddət keçdikdən sonra göndərilib, onlardan 33-ü natamam olub. Yalnız 16 sorğu qanunvericiliyə uyğun gəlib. Jurnalistlərin 200 şifahi sorğusunun isə 8-nə cavab almaq mümkün olub. Dövlət qurumlarının internet saytlarının araşdırılması zamanı 30 dövlət qurumundan 6-nın saytının olmadığı üzə çıxıb. Hesabatda saytları olan dövlət qurumlarından Rabitə və İnformasiya Texnologiyaları Nazirliyinin internet saytı 58 balla birinci, Kənd Təsərrüfatı Nazirliyinin saytı isə 9 balla sonucu yeri tutub. MHİ cavab verilməyən 51 sorğu ilə bağlı məhkəməyə müraciət edib. Məhkəmələr 13 sorğunu icraata götürməkdən imtina edib, icraata götürülən 38 iddiadan 29-u isə təmin olunmayıb. İddiaların 5-nə baxış zamanı tərəflər anlaşma əldə etdikləri üçün iddia geri götürülüb, 4 iddia təmin olunub.