Media

Ana səhifə

Media

“Guardian” qəzetinin oğurlanmış əməkdaşı iki əfqanıstanlı müxbirlə birgə girovluqdan azad edilib

18 dekabr 2009 08:38 (UTC +04:00)

Bakı-APA. “Guardian” qəzetinin oğurlanmış əməkdaşı iki əfqanıstanlı müxbirlə birgə azad edilib. APA-nın xəbərinə görə, bu barədə Beynəlxalq Mətbuat İnstitutundan (BMİ) Beynəlxalq Avrasiya Mətbuat Fonduna məlumat verilib. Böyük Britaniyanın “Guardian” qəzetinin İraqlı əməkdaşı iki əfqanıstanlı həmkarı ilə birgə Əfqanıstanın Şimal-Şərq bölgəsində altı gün girov saxlanıldıqdan sonra azad edilib. Oğurlanan jurnalist Qeys Əbdül-Əhəd son dəfə dekabrın 9-da “Guardian” qəzeti ilə əlaqə saxlayıb. İki gün sonra qəzetə üç jurnalistin oğurlanması barədə informasiya verilib.
Jurnalistlərin sağ-salamat geri qaytarılmasını təmin etmək məqsədilə ictimaiyyətə bu barədə xəbər verilməyib. Onların ailələrinə, Böyük Britaniyanın və Əfqanıstanın müvafiq orqanlarına məlumat verilib. Məlumatla görə, əfqanıstanlı jurnalistlərin adları təhlükəsizlik məqsədilə açıqlanmayıb.
“Guardian” qəzeti yazıb ki, bu üç jurnalist Pakistanın Şimal-Qərb Sərhəd Əyalət ilə həmsərhəd olan dağlıq bölgədəki döyüşçülərdə müsahibə götürməyi planlaşdırıblarmış. Onlar keçən həftə silahlı dəstə tərəfindən tutulublar. Ərazi Taliban və Ərəb döyüşçülərinin, eləcə də “Hezb-e-İslami” kimi müxtəlif qruplaşmalar və cinayətkar dəstələrin dayağı kimi tanınır.