Media

Ana səhifə

Media

“Qloballaşma və konvergensiya şəraitində regional medianın vəziyyəti: reallıqlar və müasir tendensiyalar” mövzusunda konfransın növbəti iclasları keçirilib - FOTO

22 dekabr 2009 10:20 (UTC +04:00)

Bakı-APA. Azərbaycan Mətbuat Şurasının (MŞ) «Qloballaşma və konvergensiya şəraitində regional medianın vəziyyəti: reallıqlar və müasir tendensiyalar» mövzusunda Yevlaxda təşkil etdiyi konfrans çərçivəsində bu gün növbəti iclas keçirilib. Şuradan APA-ya verilən məlumata görə, sayca dördüncü iclas əyalət həyatının Azərbaycan mediasında təsvirinə həsr olunub.
MŞ sədri Əflatun Amaşov müzakirəyə çıxarılan mövzuların əhəmiyyəti barədə danışıb. Onun sözlərinə görə, ölkənin aparıcı KİV-nin region həyatını bütün pozitiv və neqativ cəhətləri ilə birgə işıqlandırması həmin ərazinin ictimai-siyasi mühitinin formalaşmasında vacib amillərdən sayılır. Bu baxımdan KİV-in bölgə olaylarına sistemli və ardıcıl şəkildə yanaşmasına zərurət duyulur.

Mövzu ilə bağlı məruzə edən «Xalq qəzeti»nin baş redaktor müavini Tahir Aydınoğlu deyib ki,
aparıcı KİV-in region həyatının işıqlandırmasında başlıca mövqe rəsmi dövlət qəzetlərinə məxsusdur: “Əlbəttə, burada da müəyyən problemlər var. Amma bu bilgilər kifayət qədər əhatəli olur və faktoloji təsir bağışlayır”.

Bundan sonra bəhs edilən mövzu ətrafında müzakirələr başlanıb. Çıxışçılar mövzunun aktuallığını vurğulamaqla yanaşı qarşılaşdıqları bir sıra praktik situasiyalar barədə məlumat veriblər.
Konfransın beşinci iclası bölgə KİV-in məhkəmə və hüquq-mühafizə orqanları ilə əlaqələrinə həsr olunub. Məsələ ilə bağlı çıxış edən Beynəlxalq Avrasiya Mətbuat Fondunun proqram departamentinin rəhbəri Nik Nvolisa bildirib ki, qloballaşan dünyada informasiya-texnologiyalarının inkişafı medianın funksiya və formalarında dəyişiklik yaradır. Bu dəyişikliklər ilk növbədə operativliklə əlaqəlidir.

Yevlax şəhər prokuroru Firdovsi Nemətli mövzu ilə bağlı çıxışda informasiyanı hakimiyyətə ən qısa yol kimi dəyərləndirib. F. Nemətli bildirib ki, hüquq-mühafizə orqanlarının media ilə işə üstünlük verməsi tendensiyasının özünü Baş Prokurorluğun fəaliyyətində daha çox göstərir. Onun sözlərinə görə, artıq mediadan yayınmaq dövrü arxada qalmalıdır və bunun bir sıra əyani nümunələri var: «Bəzən baş vermiş hər hansı hadisə ilə bağlı informasiyanın verilməməsi həmin hadisənin detallı öyrənilməsi zərurətindən irəli gəlir. Başqa hər hansı səbəb məlumat verilməməsi üçün əsas sayıla bilməz. Jurnalistin fəaliyyətinə əməli kömək göstərilməlidir».

Qeyd edək ki, Yevlaxda «Qloballaşma və konvergensiya şəraitində regional medianın vəziyyəti: reallıqlar və müasir tendensiyalar» mövzusunda konfrans dekabrın 23-dək davam edəcək.