Media

Ana səhifə

Media

APA-nın nəşr etdirdiyi “Jurnalistlər üçün hərbi məlumat kitabı”nın təqdimatı keçirilib - FOTOSESSİYA

APA-nın nəşr etdirdiyi “Jurnalistlər üçün hərbi məlumat kitabı”nın təqdimatı keçirilib - <font color=red>FOTOSESSİYA</font>

29 dekabr 2009 11:07 (UTC +04:00)

Bakı - APA. Bu gün APA İnformasiya Agentliyi Azərbaycan Prezidenti yanında KİV-in İnkişafına Dövlət Dəstəyi Fondunun dəstəyi ilə reallaşdırdığı “Hərbi vətənpərvərlik şüurunun formalaşdırılmasına KİV dəstəyi” adlı layihə çərçivəsində nəşr etdirdiyi “Jurnalistlər üçün hərbi məlumat kitabı”nın təqdimatını keçirib. APA-nın xəbərinə görə, tədbirdə çıxış edən agentliyin baş direktorunun birinci müavini Nurşən Quliyev bildirib ki, kitab, əsasən hərbi sahədən yazan jurnalistlər üçün nəzərdə tutulub: “Layihə çərçivəsində müxtəlif mövzuda tədbirlər keçirilib, yekun olaraq adıçəkilən kitab nəşr olunub. 1000 tirajla buraxılmış kitabda hərbi sahədən yazan jurnalistlər, eləcə də bu mövzuya maraq göstərənlər üçün gərəkli olacaq bir sıra hərbi termin və anlayışların izahı verilib. Hərbi Hava Qüvvələri, Hərbi Dəniz Qüvvələri, Sərhəd Qoşunları kimi spesifik strukturlara aid terminlər isə ayrıca bölmədə göstərilib. Kitaba Azərbaycanın hərb tarixi ilə bağlı günlər, hərbi dövlət və qeyri-dövlət təşkilatlarının ünvanları, əlaqəli şəxsləri, veb-saytları, elektron poçtları daxil edilib. Hərbçilərin rütbə və fərqlənmə nişanları da kitabda yer alıb”.

Azərbaycanın müharibə vəziyyətində olduğunu xatırladan N. Quliyev deyib ki, bu səbəbdən mətbuatda hərbi mövzuda yazılara tez-tez rast gəlinir: “Bu yazılarda isə hərbi terminlərin istifadəsi zamanı müəyyən problemlərə rast gəlinir. Məhz bu problemi görüb, adıçəkilən kitabın nəşrini məqsədəuyğun hesab etdik. Düşünürük ki, kitab jurnalistlərə yardımçı ola biləcək”.

Nəşrin əhəmiyyətindən danışan kitabın redaktoru Cavid Cabbaroğlu bildirib ki, bu işin nə dərəcədə uğurlu olub-olmamasına jurnalistlər qərar verəcəklər. Kitab pulsuz olaraq mətbuat orqanlarına və kitabxanalara paylanacaq. C. Cabbaroğlu kitabın tərtib olunmasında Azərbaycan Ərazilərinin Minalardan Təmizlənməsi üzrə Milli Agentlik (ANAMA), Müdafiə Nazirliyi, Dövlət Sərhəd Xidməti, Daxili Qoşunlar, Müdafiə Sənayesi Nazirliyi və Ehtiyatda və İstefada olan Zabitlər İctimai Birliyinə təşəkkürünü bildirib.

Kitabın tərtibatçılarından biri Rəşad Süleymanov qeyd edib ki, hərbi mövzuda yazan jurnalistlərin bəzilərinin yazılarında primitiv səhvlərə rast gəlinir. Bu kitabın işıq üzü görməsində əsas məqsəd də məhz bu neqativ halların qarşısının alınmasına yardımçı olmaqdır. O, kitabda Azərbaycanın hərb tarixi, rayonların işğal günləri haqda məlumatların da yer aldığını söyləyib.

Nəşrin digər tərtibatçısı Ramil Məmmədli isə kitabda 300-ə yaxın hərbi terminin toplandığını bildirib. Onun sözlərinə görə, mətbuat nümayəndələrinin bəzilərinin öz yazılarında hələ də SSRİ dövrünün hərbi terminologiyasından istifadə etmələri kitabın ərsəyə gəlməsinin səbəblərindən biri olub.

Tədbirdə çıxış edən “Azərbaycan Ordusu” qəzetinin baş redaktor müavini İbrahim Rüstəmov, Minalar Əleyhinə Azərbaycan Kampaniyası İctimai Birliyinin sədri Hafiz Səfixanov, Könüllü Hərbi Vətənpərvərlik Texniki İdman Cəmiyyətinin (KHVTİC) mətbuat xidmətinin rəhbəri Valid Qardaşlı kitabın nəşrinin əhəmiyyətli olduğunu bildiriblər. Onlar nəşrin təkcə jurnalistlər üçün deyil, bu sahəyə maraq göstərən digər şəxslər üçün də lazımlı olacağını söyləyiblər.