Media

Ana səhifə

Media

Azərbaycan Televiziyası ilə İctimai Televiziya arasında qarşıdurma yaranıb

05 yanvar 2010 16:16 (UTC +04:00)

Bakı-APA. “AzTV-nin bu addımı izah olunmur. Bu, televiziyaların işinin tənzimləyən bütün qanunların pozulmasıdır. Mətbuata pafoslu intervülər vermək özünü gülünc vəziyyətə qoymaqdan başqa bir şey deyil”. Bunu APA-ya açıqlamasında son günlər Azərbaycan Televiziyası (AzTV) ilə İctimai Televiziya ( İTV) arasında yaranmış insidentə münasibət bildirən İTV-nin İctimaiyyətlə əlaqə və monitorinq şöbəsinin rəisi Tahir Məmmədov deyib.

Qeyd edək ki, 2006-cı ilin yanvarından İTV-də jurnalist Səyyarə Məmmədovanın təqdimatında yayımlanan “Ovqat” verilişinin aparıcısının AzTV-yə transfer etməsi ilə veriliş də eyni ad və formatda dövlət televiziyasında yayınlanmağa başlayıb. Bu isə İTV-nin etirazına səbəb olub.

T. Məmmədov bildirib ki, AzTV “Ovqat” proqramının tam eynisini və anonsunu yayımlamaqla “Reklam haqqında” qanunun müddəalarını, həmçinin “Haqsız rəqabət haqqında” qanunun 3-cü maddəsinin rəqibin təsərrüfat fəaliyyətinin təqlidi, nüfuzdan salınması, fəaliyyətə müdaxilə, haqsız işgüzarlıq davranışı, istehlakçıların çaşdırılması müddəaları pozub: “Bundan başqa, AzTV “Teleradio haqqında” qanunun müddəalarını və “Müəllif hüquqları və əlaqəli hüquqlar haqqında” qanunun bütün müddəalarını pozub”.

İTV nümayəndəsinin dediyinə görə, Səyyarə Məmmədova 15 aprel 2007-ci ildə Müəllif Hüquqları Agentliyinə təqdim etdiyi ərizədə hazırladığı Ovqat verilişinin müstəsna hüquqlarının İctimai Televiziya və Radio Yayımları Şirkətinə məxsus olduğunu göstərib: “Həmin ərizəyə əsasən, Müəllif Hüquqları Agentliyi 17 aprel 2007-ci il tarixində proqramın müstəsna müəlliflik hüququnun İctimai Teleradioya məxsus olmasını təsdiqləyən 4379 saylı Şəhadətnaməni şirkətimizə təqdim edib”.

AzTV-nin İctimaiyyətlə əlaqə şöbəsinin rəhbəri Xatirə Qasımova isə APA-ya məsələdən məlumatsız olduğunu deyib. Hazırda AzTV-dəki “Ovqat” verilişinin aparıcı olan Səyyarə Məmmədova isə hər şeyin qanun çərçivəsində edildiyini deməklə kifayətlənib.