Media

Ana səhifə

Media

Azərbaycan Mətbuat Şurası Eynulla Fətullayevlə bağlı daxili işlər nazirinə müraciət edib

06 yanvar 2010 15:53 (UTC +04:00)

Bakı. Kəmalə Quliyeva - APA. Azərbaycan Mətbuat Şurası (MŞ) həbsdə olan jurnalist Eynulla Fətullayevlə bağlı daxili işlər naziri Ramil Usubova müraciət edib. Bu barədə APA-ya MŞ sədri Əflatun Amaşov bildirib. Ə. Amaşov deyib ki, E. Fətullayevin üzərində heroin tapılması ilə bağlı verilən məlumatları şura diqqətdə saxlayır: “O, artıq Bakı İstintaq Təcridxanasına köçürülüb. İstintaqı Qaradağ rayon Polis İdarəsi aparır. Bu məsələnin həm media, həm də ictimaiyyətin diqqət mərkəzində olduğunu nəzərə alıb, daxili işlər nazirindən istintaqın obyektiv aparılmasının təmin olunmasını xahiş etmişəm”.

E. Fətullayevin məsələsi ilə bağlı MŞ-nın ayrıca jurnalist araşdırmasına gəlincə, Ə. Amaşov bildirib ki, hələlik buna ehtiyac yoxdur: “İstintaqı ilk mərhələdə hansı qurum aparmalıdırsa, o da aparır. Təkcə Eynulla Fətullayevlə bağlı deyil, həbsdə olan bütün jurnalistlərlə bağlı məsələ daim Şuranın diqqət mərkəzindədir. Bu məsələni də axıra qədər diqqətdə saxlayacağıq”.

Qeyd edək ki, “Gündəlik Azərbaycan” və “Realnı Azerbaydjan” qəzetlərinin baş redaktoru Eynulla Fətullayev 2007-ci il aprelin 20-də Yasamal Rayon Məhkəməsinin qərarı ilə məhkəmə zalında həbs edilib. Jurnalist 2005-ci ildə qələmə aldığı “Qarabağ gündəliyi” adlı silsilə yazılarında xocalıları təhqir etməkdə günahlandırılıb və ona 2 il 6 ay həbs cəzası verilib. Tutulandan sonra ona əlavə ittihamlar irəli sürülüb və jurnalist 2007-ci il oktyabrın 30-da 8 il 6 ay müddətinə azadlıqdan məhrum edilib. 2009-cu il dekabrın 30-da isə 12 saylı Cəzaçəkmə Müəssisəsində saxlanılan E. Fətullayevin üzərində 0,223 qram həcmində heroin aşkarlanıb. Bununla əlaqədar olaraq ona qarşı Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi başlanıb.

Eynulla_Fətullayev