Media

Ana səhifə

Media

MTRŞ sədri: “Bir verilişə görə “Euronews”u kabel şəbəkəsindən çıxarmaq doğru olmaz” - MÜSAHİBƏ

MTRŞ sədri: “Bir verilişə görə “Euronews”u kabel şəbəkəsindən çıxarmaq doğru olmaz” - <font color=red>MÜSAHİBƏ</font>

14 yanvar 2010 15:09 (UTC +04:00)

- Parlament seçkilərinə qədər əksər bölgələrdə televiziya kanallarının açılacağı ilə bağlı bir neçə dəfə açıqlama vermisiniz. Bu il ərzində hansı bölgələrdə yeni telekanalların açılacağı gözlənilir?

- Biz bunda maraqlıyıq. Parlament seçkilərinə qədər əksər bölgələrdə televiziya kanallarının açılması zəruridir. Bu istiqamətdə xeyli iş görmüşük. Əsas bölgələrdə belə kanallar açılıb, yalnız Mərkəzi Aran zonası qalıb. Biz çalışacağıq ki, bu bölgədə də televiziya kanalının açılması məsələsini həll edək. Ancaq bu, tək bizim istəyimizdən asılı deyil. Regionlarda yeni kanalın açılması asan məsələ deyil. Biz bunu digər televiziya kanallarının fəaliyyətində artıq görmüşük. Həmin ərazilərdə televiziya kanallarının maddi-texniki bazasının, mütəxəssislərin, kadr potensialının olmaması bizi bu işdə tələsməməyə sövq edir.

- Parlament seçkilərinə qədər yalnız Mərkəzi Aran regionunda televiziya açılacağı gözlənilir?

- Digər bölgələrin hamısında artıq televiziya kanalları var. Bu yaxınlarda Şəki-Zaqatala bölgəsində əlavə bir televiziya kanalı açılıb. Yevlaxda da bir televiziya kanalı fəaliyyətə başladı. Bu kanallar həmin bölgələri təmin edə bilər. Başqa bölgələrdə də televiziya kanalları var. Yalnız Mərkəzi Aran bölgəsində belə kanal yoxdur. Onun üzərində də işlər aparılır.

- Bu il ərzində ölkədə yeni ümumrespublika yayımçısının olacağı gözlənilir?

- Bu proses həmişə ola bilər. Milli Televiziya və Radio Şurası öz mövqeyini dəfələrlə bildirib. Hələlik televiziya kanallarının sayını artırmaq fikrində deyilik. Azərbaycanda yeni televiziya kanallarının açılması bunun üçün şərait yetişəndə həyata keçir. Biz hesab edirik ki, Azərbaycanda reklam bazarının daha da inkişaf etməsi, kadr potensialının daha da artması zəruri faktorlardan biridir. Ona görə də bu məsələdə müəyyən qədər tələskənliyə yol vermək olmaz.

- Bildirmisiniz ki, bütün Qafqazı əhatə edəcək mədəniyyət kanalının açılmasına ehtiyac var. Bu kanalın açılması nə zaman reallaşa bilər?

- Sahə xarakterli kanalların açılması istəyi həmişə var. İstənilən ölkədə maarifləndirici, mədəniyyət xarakterli kanalın açılması çox arzu olunandır. Ancaq böyük dövlətlərdə bu, daha asan reallaşır. Kiçik dövlətlərdə sahə kanallarının açılması çox çətindir. Biz bunu istəyirik. Amma bu istəyi həyata keçirmək üçün hələ bir çox amillər ortada yoxdur.

- MTRŞ-ya belə bir təklif gəlsə, siz bunu müzakirə edə bilərsiniz?

- Biz ümumrespublika yayımçılarının fəaliyyətini izləyərək görürük ki, hələlik yeni kanalların açılmasına tam hazır deyilik.

- Telekanallarda aparılan monitorinqlər bitibmi? Yeni qanun pozuntuları qeydə alınıb?

- Monitorinqlər həmişə aparılır. Monitorinqlər zamanı hər hansı qanun pozuntusu ortaya çıxırsa, ona uyğun da tədbir görürük. Son zamanlar kanallarda kobud qanun pozuntuları qeydə alınmayıb. Qanun pozuntuları yalnız reklamla bağlıdır. Ayrı-ayrı hallarda belə qanun pozuntuları qeydə alınıb. Buna müvafiq olaraq da tədbirlər görülüb.

- Telekanallarda Azərbaycan dilinin işlənməsi, şou-proqramlarla bağlı vəziyyət əvvəlkindən bir o qədər də fərqlənmir.

- Mən bu qədər radikal mövqedən çıxış etməyin tərəfdarı deyiləm. Demək olar ki, Azərbaycanın efirində Azərbaycan dili tam hökmrandır. Biz buna tam nail olmuşuq. Amma verilişlərdə müəyyən hallar var ki, orada bizim anladığımız dildə danışırlar. Rus dilini də, türk dilini də ölkə əhalisinin böyük əksəriyyəti bilir. Biz Azərbaycan dilinin işlənməsi ilə bağlı qərarı verərkən bildirmişdik ki, ictimai-siyasi əhəmiyyət kəsb edən yüksək səviyyəli görüşlərdə, maarifçilik xarakterli verilişlərdə istisna hallar ola bilər.

- MTRŞ-nın növbəti iclası nə vaxt keçiriləcək?

- Bizim işlərimiz öz qaydası ilə gedir. MTRŞ qanunla öz üzərinə qoyulan səlahiyyətləri yerinə yetirir. Növbəti iclasımız yanvarın 15-də keçiriləcək. Cari məsələlərə baxacağıq, eyni zamanda 20 Yanvar faciəsi ilə bağlı müzakirələr keçirəcəyik.

- “Euronews”la bağlı problem tamamilə aradan qaldırılıbmı? Kanalın nümayəndələri yanvar ayında Azərbaycana gəlməli idilər.

- Onlar yanvarın 17-də gələcəklərini demişdilər. “Euronews”la bağlı mövqeyimizi ortaya qoymuşuq. Bir dəfə belə verilişi verməklə “Euronews”u kabel şəbəkəsindən çıxarmaqla bağlı qərar verməyimiz doğru olmaz. Əgər belə verilişlər mütəmadi davam edərsə, o zaman biz qərar verə bilərik. Məsələni belə sərt şəkildə qoymaq heç kəsə xeyir verən deyil.

- Mətbuatda Azərbaycanda yeni televiziya kanalının - “Nərgiz” TV-nin fəaliyyətə başlayacağı barədə məlumatlar verilir. Şurada bununla bağlı hər hansı məlumat varmı?

- Belə bir məsələ yoxdur. Şurada hələlik bununla bağlı hər hansı müzakirə aparılmayıb. Belə məsələ ortaya çıxarsa, ictimaiyyətə məlumat verəcəyik.