Media

Ana səhifə

Media

Azərbaycanda Novruz bayramı münasibətilə fərdi jurnalist yazılarının müsabiqəsi elan edilib

19 yanvar 2010 15:26 (UTC +04:00)

Bakı. Kəmalə Quliyeva – APA. Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu Novruz bayramı münasibəti ilə fərdi jurnalist yazılarının müsabiqəsini elan edib. Bu barədə APA-ya Fonddan məlumat verilib. Fərdi jurnalist yazıları müsabiqəsi “Kütləvi informasiya vasitələrinin inkişafına dövlət dəstəyi Konsepsiyası” ilə müəyyən edilmiş dövlət dəstəyinin prioritet sahələrinə uyğun olaraq aşağıdakı istiqamətlər üzrə elan edilib:
- Azərbaycan Respublikasında söz və məlumat azadlığının, plüralizmin inkişaf etdirilməsi, insan hüquq və azadlıqlarının müdafiəsi dövlət siyasətinin prioritet istiqamətidir;
- Ermənistan-Azərbaycan, Dağlıq Qarabağ münaqişəsi, Ermənistanın Azərbaycana qarşı soyqırım siyasəti haqqında həqiqətlər;
- Qloballaşma dövründə Azərbaycan xalqının adət-ənənələrinin, milli-mənəvi dəyərlərin qorunması və təbliği. Novruz - yeni il, yeni arzular bayramıdır;
- Azərbaycanda informasiya və kommunikasiya texnologiyalarının inkişaf etdirilməsi sahəsində həyata keçirilən siyasət və onun praktiki nəticələri;
- 2010 – ekologiya ilidir: ekologiya və ətraf mühitin mühafizəsi hər bir vətəndaşın borcudur;
- Azərbaycan regionları dünən və bu gün: dövlət proqramlarının həyata keçirilməsinin praktiki nəticələri;
- Azərbaycan təhsilinin dünya təhsil sisteminə inteqrasiyası: nailiyyətlər, problemlər və perspektivlər.

Müsabiqə elan olunanadək ən azı bir il müddətində kütləvi informasiya vasitələrində fasiləsiz işləyən şəxslər müsabiqədə iştirak edə bilərlər. Yazılar fond tərəfindən elan edilmiş mövzulardan birinə uyğun olmalıdır. Müsabiqəyə hər jurnalist yalnız bir yazı təqdim edə bilər. Yazı son bir ildə həftədə bir dəfədən az olmayaraq nəşr edilən, Azərbaycan Mətbuat Şurasının tərtib etdiyi “qara siyahı”ya düşməyən mətbuat orqanlarında Azərbaycan dilində dərc olunmalıdır (xarici dildə nəşr olunan mətbuat orqanlarında dərc edilmiş yazılar Azərbaycan dilinə tərcümə olunmuş şəkildə Fonda təqdim edilməlidir).

Hər mövzu üzrə 2 qalib, 3-cü mövzu üzrə 3 qalib müəyyənləşdiriləcək. Hər mövzu üzrə maksimum 60 bal müəyyən olunur. 30-dan aşağı bal toplayan iştirakçı qalib ola bilməz. Qaliblər Fondun xüsusi diplomu və 1000 (bir min) manat məbləğində pul mükafatı ilə təltif olunacaqlar. Fondun 2009-cu ildə keçirdiyi fərdi jurnalist yazıları müsabiqəsinin qaliblərinin bu müsabiqədə iştirakına icazə verilmir. Yazılar A3 formatda 1 səhifədən (9-11 min işarə) çox olmamalıdır. Nəticələr martın 20-dək elan ediləcək. Yazılar və sənədlər Fonda şəxsən yanvarın 19-dan martın 1-dək təqdim edilə bilər.