Media

Ana səhifə

Media

KİV-in İnkişafına Dövlət Dəstəyi Fondu ötən ilin yekunları və bu il qarşıda duran vəzifələrlə bağlı hesabat verib

10 fevral 2010 11:14 (UTC +04:00)

Bakı. Kəmalə Quliyeva – APA. Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu 2009-cu il üçün maliyyə hesabatını və 2010-cu ildə görəcəyi işlərlə bağlı planlarını açıqlayıb. APA-nın məlumatına görə, bu gün keçirdiyi tədbirdə Fondun icraçı direktoru Vüqar Səfərli bildirib ki, ötən il rəhbərlik etdiyi quruma dövlət büdcəsindən 1 milyon 304 min 160 manat pul ayrılıb. Bu məbləğdən 204 min 160 manatı Fondun saxlanma xərclərinə sərf olunub. İl ərzində Milli Mətbuat Günü münasibətilə 39 redaksiyaya 39 min manat həcmində birdəfəlik maliyyə yardımı ayrılıb. Fond ötən il ümumilikdə 63 layihənin maliyyələşməsinə 676 min 873 manat vəsait xərcləyib. Jurnalistlərin fərdi jurnalist müsabiqəsinin qalibi olmuş 33 jurnalistə isə 33 min manat məbləğində maliyyə yardımı verilib.

V. Səfərlinin sözlərinə görə, Fonda bu il üçün ayrılan maliyyə vəsaitlərinin həcmində ciddi dəyişiklik yoxdur: “İl ərzində Fonda 2 milyon manat pul ayrılıb. İndiyədək dövlət tərəfindən maliyyələşən bir sıra KİV-lərin maliyyələşməsi də Fonda həvalə edildiyindən, bu məbləğin 700 min manatı bu məqsədlə istifadə olunacaq. Qalan 1 milyon 300 min manat isə yenə də Fondun hesabındadır”.
Fondun bu il elan etdiyi layihə müsabiqəsi və Novruz bayramı münasibətilə fərdi jurnalist yazılarının müsabiqəsi üçün ayrılan vaxt isə martın 1-də başa çatacaq: “Qaliblər isə martın 17-də elan ediləcək. Təəssüflər olsun ki, indiyədək Fonda nə bir layihə, nə də yazı daxil olmayıb. Ötən il də belə olmuşdu. Nədənsə jurnalistlər və qəzetlər axırıncı həftədə layihələri gətirməyə başladılar”.

İcraçı direktor bildirib ki, bu il milli mətbuatın yaradılmasının 135 illik yubileyi münasibətilə bir sıra tədbirlərin keçirilməsi də nəzərdə tutulur: “Milli Mətbuat Günü münasibətilə yenə də aparıcı KİV-lərə birdəfəlik maliyyə vəsaitinin ayrılması gözlənilir. Bayram münasibətilə qabaqcıl jurnalistlərə ölkə prezidenti tərəfindən fəxri adlar veriləcək. Fond bayram münasibətilə fərdi jurnalist yazılarının müsabiqəsini də elan edəcək”.