Media

Ana səhifə

Media

Azərbaycanda ən operativ mətbuat xidmətinin müəyyən olunması ilə bağlı keçirilən rəy sorğusunun nəticələri açıqlanıb

17 fevral 2010 11:06 (UTC +04:00)

Bakı. Elnur Məmmədli – APA. Söz Azadlığını Müdafiə Fondu “KİV-lərin informasiya alması zamanı ən operativ mətbuat xidmətinin müəyyən olunması”nı aydınlaşdırmaq üçün keçirdiyi rəy sorğusunun nəticələri açıqlanıb. APA-nın məlumatına görə, bununla bağlı keçirilən mətbuat konfransında fondun rəhbəri Musa Yaqub bildirib ki, sorğu 2 ay müddətində müxtəlif mətbuat orqanları arasında çalışan 500-dək jurnalist arasında keçirilib. Fondun icraçı direktoru Vüqar Tofiqli isə sorğunun nəticələrini açıqlayıb. Onun sözlərinə görə, respondentlərin 5.7 faizi dövlət qurumlarının mətbuat xidmətlərinin fəaliyyətindən qane olduğunu bildirib. 60.3 faizi bu fəaliyyətin onları qismən qane etdiyini, 31.4 faizi qane etmədiyini bildirib. “Dövlət orqanlarının mətbuat xidmətlərində informasiya açıqlığı necə təmin olunur?” sualına cavab olaraq sorğu iştirakçılarının 4.8 faizi yaxşı, 36.7 faizi pis, 55.7 faizi orta səviyyədə qiymətləndirib və 2.8 faizi cavab verməkdə çətinlik çəkib. İnformasiyanın ötürülməsində operativliyə əməl edən mətbuat xidməti barədə suala iştirakçıların 16.6 faizi Xarici İşlər Nazirliyinin mətbuat xidmətini göstərib. Sonrakı yerlərdə Daxili İşlər Nazirliyi, Fövqəladə Hallar Nazirliyi, Vergilər Nazirliyi, Ekologiya və Təbii Sərvətlər Nazirliyi, Dövlət Gömrük Komitəsi, Nəqliyyat Nazirliyi, Mərkəzi Seçki Komissiyası, Tələbə Qəbulu üzrə Dövlət Komissiyası və digər dövlət qurumları gəlir.

Respondentlərin 38.3 faizi hesab edir ki mətbuat xidmətlərinin fəaliyyətinə təmsil etdikləri təşkilatların rəhbərləri, 35.6 faizi xidmət rəhbəri vəzifəsinə qeyri-peşəkarların təyinatı, 16.8 faizi jurnalistlərin qeyri-peşəkarlığı mane olur.

2009-cu ildə fəaliyyəti qənaətbəxş hesab olunan təşkilatlara gəldikdə birinci yeri XİN tutub. Sonra FHN, MSK, Rabitə Nazirliyi, Vergilər Nazirliyi, Dövlət Gömrük Komitəsi, Ekologiya Nazirliyi, Təhsil Nazirliyi və digər dövlət qurumları ilk yerləri tutublar.

Dövlət qurumlarının internet resurslarının qiymətləndirilməsində isə ilk beşliyi Vergilər Nazirliyi, MSK, FHN, DİN, XİN tutur.

Tədbirdə iştirak edən millət vəkili Elmira Axundova isə bildirib ki, 90-cı illərdə jurnalistlər daha rahat işləyirdilər, nəinki indi. O, həmçinin, jurnalistlərin fəaliyyətindən də narazı olduğunu vurğulayıb.

Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə isə bildirib ki, sorğuda təmsil etdiyi təşkilatın tutduğu yer onu qane etmir: “Tələbə qəbulu zamanı komissiyada hər həftə mətbuat konfransları keçirilir, mətbuata operativ olaraq məlumatlar çatdırılır”.

Müdafiə Nazirliyinin mətbuat xidmətinin rəis müavini Teymur Abdullayev də sorğunu subyektiv qiymətləndirib: “Müdafiə Nazirliyinin mətbuat xidməti hər gün cəbhə bölgəsində baş verən hadisələri, monitorinqlərin nəticələrini operativ olaraq açıqlayır. Sorğuda isə 20-ci yeri tutmuşuq. Müdafiə Nazirliyinin internet saytı yoxdur, amma sorğuda internet resurslarının səviyyəsi ilə bağlı sualda 17-ci yeri tutmuşuq. Bu necə olur?”.
Musa Yaqub isə qeyd edib ki, dövlət qurumlarının mətbuat xidmətlərinin rəhbərləri sərbəst olmur və onların səlahiyyətləri dar çərçivədə olur: “Səlahiyyət olmayanda isə təbi ki, operativ işləmək, məlumatları açıqlamaq mümkün deyil”.