Media

Ana səhifə

Media

Azərbaycanın Dövlət İnformasiya agentliyinin yaranmasından 90 il ötür

28 fevral 2010 09:30 (UTC +04:00)

APA-nın məlumatına görə, agentliyin baş direktoru Aslan Aslanov yubileylə bağlı məqalə ilə çıxış edib.

Məqalədə göstərilib ki, Şərqdə ilk xəbər agentliklərindən biri olan AzərTAc-ın yaranması bilavasitə Xalq Cümhuriyyəti hökumətinin adı ilə bağlıdır.

Qurum 1920-ci ildə AzərTAc, yenə həmin ildə AzQafROSTA, 1921-ci ildə AzərTA, 1923-cü ildə ZaqTA, 1936-cı ildə yenidən AzərTA, 1972-ci ildə Azərinform, nəhayət, 1992-ci ildə AzərTAc adlandırılıb.

“AzərTAc” imzası ilə ilk xəbərlər 1920-ci il martın 2-də “Azərbaycan” qəzetində dərc olunub. Təxminən bir ay sonra, 1920-ci il martın 25-də Azərbaycan Teleqraf Agentliyindən Xalq Maarif Nazirliyinə göndərilmiş 17 nömrəli təliqə qurumun məhz martın 1-də yarandığını təsdiq edən daha bir tutarlı dəlildir. Təliqədə hökumətin 1 mart tarixli Qanununa uyğun olaraq, Poçt və Teleqraf Nazirliyinin nəzdində Azərbaycan Teleqraf Agentliyinin yaradıldığı və onun formalaşma dövrü yaşadığı qeyd olunub.

Bundan əlavə, təliqədə aprel ayının 1-dən etibarən hökumət tabeliyində olan müəssisələrdən və vəzifəli şəxslərdən AzərTAc-ın bülletenlərinə abunə yazılışının başlanacağına dair məlumat da yer alıb.

Azərbaycanda sovet hakimiyyəti qurulandan sonra isə AzərTAc Rusiya Teleqraf Agentliyinin (ROSTA) filialı kimi fəaliyyətini davam etdirib.

1921-ci ildə AzQafRostanın bazasında AzərTA təşkil olunub.

Zaqafqaziya Federasiyası yarandıqdan sonra 1923-cü ilin martında üç Cənubi Qafqaz respublikasının informasiya agentlikləri ZaqTA adı altında birləşdirilib. 1936-cı ildə isə Azərbaycan Teleqraf Agentliyi yenidən AzərTA adı ilə fəaliyyətini bərpa edib.

1972-ci ilin iyununda isə respublika Nazirlər Sovetinin qərarı ilə Azərbaycan İnformasiya Agentliyi - Azərinform adlandırılıb.

1992-ci il dekabrın 18-də Azərinformun tarixi adı bərpa olunub və Azərbaycan Teleqraf Agentliyi - AzərTAc adlandırılıb.

1995-ci il martın 3-də Prezident Heydər Əliyev Azərbaycan Teleqraf Agentliyinin yenidən təşkil edilməsi haqqında Fərman imzalayıb.
Hazırda agentlik gün ərzində Azərbaycan, rus və ingilis dillərində orta hesabla 450 min işarədən çox informasiya və 40-50 fotoinformasiya yayır.

AzərTAc-ın xarici ölkələrdə, respublikanın bölgələrində 20 müxbir məntəqəsi fəaliyyət göstərir.

Agentliyin Türkiyə, Rusiya, İtaliya, Rumıniya, İran, Bolqarıstan, Çin, Qazaxıstan, Ukrayna, Koreya Respublikası, Küveyt, Macarıstan, İndoneziya, Serbiya, Misir, Albaniya, Latviya, Belarus, Moldova, İordaniya, Monqolustan, Qırğızıstan, Tacikistanın milli informasiya agentlikləri ilə əməkdaşlıq müqavilələri var.

AzərTAc Müstəqil Dövlətlər Birliyinin üzvü olan ölkələrin Milli İnformasiya Agentlikləri Assosiasiyasının (ANİA), Türkdilli Xəbər Agentlikləri Birliyinin (TKA), Qara Dəniz İqtisadi Əməkdaşlıq Təşkilatının üzvü olan ölkələrin Milli İnformasiya Agentlikləri Assosiasiyasının (BSANNA) təsisçilərindən biridir.

Agentlik Asiya və Sakit Okean Ölkələri İnformasiya Agentlikləri Təşkilatı, Asiya Xəbər Agentlikləri Konsorsiumu, Avropa Xəbər Agentlikləri Alyansının üzvüdür.