Media

Ana səhifə

Media

“Mətbuat yayımı və onun mövcud vəziyyəti: problemlərdən çıxış yolları” mövzusunda dəyirmi masa keçirilib

09 aprel 2010 10:12 (UTC +04:00)

Bakı. Elbrus Seyfullayev - APA. Bu gün Mətbuat Şurasında (MŞ) “Mətbuat yayımı və onun mövcud vəziyyəti: problemlərdən çıxış yolları” mövzusunda dəyirmi masa keçirilib. APA-nın xəbərinə görə, tədbirdə MŞ-nın sədri Əflatun Amaşov Azərbaycanda mətbuat yayımının vəziyyəti haqqında məlumat verib. Onun sözlərinə görə, hazırda Azərbaycanda 325 qəzet çıxır, onların ümumi tirajı 850 mindən çoxdur: “Qəzetlər abunə və əl yayımı yolu ilə satılır. İdman qəzetlərinin yayım səviyyəsi 35-40 faiz, əyləncə qəzetlərinin yayım faizi 40-45 faz, ictimai-siyasi qəzetlərin yayım səviyyəsi isə 75-80 faizdir. Qəzetlər, əsasən reklamlarla yaşayır”.

“Azərmətbuatyayım” Birliyinin rəhbəri, Prezident yanında KİV-ə Dövlət Dəstəyi Fondunun icraçı direktoru Vüqar Səfərov hazırda qeydiyyatdan keçən mətbuat orqanlarının sayının 5 minə çatdığını deyib. Onun sözlərinə görə, hazırda “Azərmətbuatyayım”da 210 adda qəzet sifariş edilib: “Bu ilin yanvarında qəzetlərin satış səviyyəsi 50 faiz təşkil edib”.

“Qaya” Mətbuat Yayımı Firmasının rəhbəri Xanhüseyn Əliyev qəzetlərin, əsasən Bakı şəhərində, bir hissəsinin isə rayonlarda satıldığını deyib. Onun sözlərinə görə, Bakı şəhərində köşklərin sayının az olması qəzet satışına təsir edir: “Kənd və qəsəbələrdə ümumiyyətlə qəzet satışı böyük problemdir. İnsanlar abunə yolu ilə qəzetlərin çatdırılmasına inanmırlar”.

“Metroservis” Mətbuat Yayımı Firmasının rəhbəri Bəkir Cəfərov isə qəzetlərdən daha çox jurnallara tələbatın böyük olduğunu deyib. O, 45 adda jurnalın satışı ilə məşğul olduqlarını diqqətə çatdırıb.

“Şərq” qəzetinin baş redaktoru Akif Aşırlı qəzet köşklərinin “Super Market”ə bənzədiyini deyib: “Köşklərdə qəzetlə bərabər hər şey satılır. Bölgələrə isə qəzetlər vaxtında çatdırılmır. Gəncəyə qəzet axşam saat 6-da gedib çıxırsa, onu kim alacaq? Biz qəzetlərin yayımı üçün ictimai şura yaratmalıyıq. Bu gün “Qasid” və “Azərmətbuatyayım” firmalarının xidmətindən imtina edilməlidir. Bir neçə aparıcı qəzet birləşib, bu addımı atmalıdır. Qazaxın 80 min əhalisi var. Amma orada cəmi iki köşk fəaliyyət göstərir. Necə olur ki, özəl mətbuat yayımlarında qəzetlər 80 faiz satılır, dövlət yayım firmalarında isə 80 faiz geri qaytarılır. Vicdanınız olsun, necə olur ki, “Azərmətbuatyayım”da “Mövqe” qəzeti 100 faiz satılır, “Şərq” qəzeti isə 90 faiz geri qaytarılır”.

“Azərbaycan” qəzetinin baş redaktoru Bəxtiyar Sadıqov isə satış firmalarının qəzetlərin satışından gələn gəlirin 30-40 faizini götürdüyünü, bunun isə ədalətsiz olduğunu deyib: “Bu həddən artıq çox məbləğdir. Qəzet satışına gəlincə, biz oxucunun ayağına getməliyik. Paytaxtda qəzet köşklərinə qarşı düşmən münasibət var. Bakı Şəhər İcra Hakimiyyəti yolüstü köşklərin hamısını yığışdırıb. Köşklərdə təqdimat da önəmli məsələdir”.