Media

Media

Azərbaycan Mətbuat Şurası daha 8 qəzet və 1 jurnalı “reket” elan edib - SİYAHI

Azərbaycan Mətbuat Şurası daha 8 qəzet və 1 jurnalı “reket” elan edib - <font color=red>SİYAHI</font>

23 aprel 2010 15:41 (UTC +04:00)

Əvvəlcə Şura sıralarına yeni üzvlərin qəbuluna baxılıb. «Bakı təhsili», «Əlillər dünyası», «Gənc müəllim» və İmişli rayonunda çıxan «Xalq sözü» qəzetlərinin MŞ sıralarına qəbulu barədə qərar çıxarılıb.

Şuranın Şikayətlər üzrə və «Reket jurnalistika»ya qarşı mübarizə komissiyalarının rəyləri əsasında Mətbuat Şurası qərarlar qəbul edib. İdarə Heyəti Şikayətlər üzrə komissiyanın “Respublika gəncləri” qəzetinin 23-30 yanvar 2010-cu il tarixli sayında Macarıstanda məhbus həyatı yaşayan azərbaycanlı zabit Ramil Səfərovla bağlı gedən yazını etik prinsiplərə sayğısızlıq, mili-mənəvi dəyərlərə zidd hərəkət, Azərbaycan xalqına qarşı hörmətsizlik kimi dəyərləndirib. Həmin materialı təkrar dərc edən qəzetə Ramil Səfərovdan, onun valideynləri qismində atası Sahib Səfərovdan üzr istəmək tövsiyə olunub. “Respublika gəncləri” qəzetinə MŞ tərəfindən ciddi xəbərdarlıq edilib, mətbu nəşrin adının Şuranın “qara siyahı”sına salınması qərara alınıb.

"Reket jurnalistika”ya qarşı mübarizə Komissiyasının təqdimatları araşdırıldıqdan sonra daha 7 qəzet və 1 jurnalın adı həmin siyahıya daxil edilib. Bunlar “Türk Azərbaycan dünyası”, “Söz azadlığı”, “Azərbaycan və iqtisadi yüksəliş”, “Qanun alidir”, “Azərbaycan tərəqqisi”, “Detektiv press”, “Qanun və həyat” qəzetləri və “Qulaqburması” jurnalıdır. Şura “Azərbaycan Cumhuriyyəti” qəzetinin fəaliyyətindəki etik pozuntulara, MŞ-nin qərarlarına sayğısızlığa görə nəşrə ilkin xəbərdarlığını edib. Qərara alınıb ki, belə halların təkrarlanacağı təqdirdə mətbu nəşr barədə daha ciddi ölçü götürüləcək.

İclasda Mətbuat Şurasının tərkibində fəaliyyət göstərən apellyasiya qrupunun da məlumatı dinlənilərək məqbul sayılıb. Qrupun adları Şuranın “qara siyahı”sında olan 20-dək mətbu orqanın müraciətinə baxdığı bildirilib və bu prosesin mərhələ-mərhələ həyata keçirilməsi məqbul saylıb. ““Reket nəşr”lərin müəyyənləşdirilməsinə dair Təlimat”ın prosedur qaydalarına əsasən, təqdimatı zəruri olan sənədləri tələblərə cavab verən belə qəzet və jurnalların məsələsinə İdarə Heyətinin növbəti iclasında baxılacaq.

İclasda “Ekologiya il” çərçivəsində Şuranın görəcəyi kompleks tədbirlər müzakirə olunub. Bundan başqa, MŞ-nin ali media mükafatının təsisi ətrafında da fikir mübadiləsi aparılıb.

reket_nəşr