Media

Ana səhifə

Media

Almatıda IX Avrasiya Media-Forumu keçirilir

27 aprel 2010 09:32 (UTC +04:00)

APA-nın məlumatına görə, tədbirin açılış mərasimində çıxış edən Qazaxıstan prezidenti Nursultan Nazarbayev bildirib ki, bu forum bəşəriyyətin aktual problemlərinin müzakirə olunduğu KİV, ictimai və digər təşkilatların təmsilçilərinin ənənəvi görüşüdür.
Onun sözlərinə görə, Qazaxıstan analoji beynəlxalq tədbirlərin təşəbbüskarı kimi artıq üç dəfə ənənəvi dünya dinlərinin qurultayını keçirib. Yaxın perspektivdə isə Astanada ATƏT-in sammitinin keçirilməsi gözlənilir: “Bu il ATƏT-də sədrik Qazaxıstana keçib. Qazaxıstan MDB məkanında bu vacib beynəlxalq təşkilatın sədrliyini qəbul edən ilk ölkədir. ATƏT-in sonuncu analoji sammitinin 1999-cu ildə İstanbulda keçirildiyini nəzərə alaraq biz bu il Astanada sammit keçirilməsi təşəbbüsü ilə çıxış etmişik. Hazırda sammitin gündəliyinə daxil ediləcək məsələlər müzakirə olunur”.
Prezident əlavə edib ki, gələn il Qazaxıstan İslam Konfransı Təşkilatında da sədrliyi qəbul edəcək. Onun sözlərinə görə, Qazaxıstan mühüm əhəmiyyətli beynəlxalq təşkilatlarda sədrlikdən yoxsulluq, qlobal iqtisadi böhran, münaqişələr, təbii kataklizmlərin nəticələri və digər dünya miqyaslı problemləri müzakirə etmək və həlli yollarını axtarmaq məqsədilə istifadə edir.
Qeyd edək ki, aprelin 27-28-də keçiriləcək media-forumda Qazaxıstanın ATƏT-ə sədrliyi, İranda siyasi vəziyyət və onun nüvə proqramı, NATO-Qazaxıstan tərəfdaşlığı, aktual dünya problemlərinin və qlobal proseslərin işıqlandırılmasında KİV-in rolu kimi məsələlər müzakirə olunacaq.