Media

Ana səhifə

Media

Mətbuat Şurasında Beynəlxalq Mətbuat Azadlığı Günü münasibətilə tədbir keçirilib

03 may 2010 12:04 (UTC +04:00)

Bakı. Elbrus Seyfullayev - APA. Azərbaycan Mətbuat Şurasında 3 may - Beynəlxalq Mətbuat Azadlığı Günü münasibətilə tədbir keçirilib. APA-nın xəbərinə görə, tədbirdə KİV rəhbərləri və jurnalist təşkilatlarının təmsilçiləri iştirak edib.

Mətbuat Şurasının sədri Əflatun Amaşov deyib ki, Azərbaycan mətbuatı dünya mətbuatının bir parçası kimi uğurla inkişaf edir, ölkədə söz və mətbuat azadlığının təmin olunması istiqamətində ciddi addımlar atılır. O bildirib ki, hazırda jurnalistikanın inkişafı ilə bağlı bır sıra uğurlu layihələr həyata keçirilməkdədir.

Prezident Administrasiyası İctimai-siyasi şöbəsinin sektor müdiri Vüqar Əliyev mətbuata dövlət dəstəyinin hər zaman hiss edildiyini, ölkədə həm elektron, həm də yazılı media üçün bərabər səviyyəli iş imkanlarının yaradıldığını söyləyib: “Azərbaycanda söz və mətbuat azadlığının yüksək səviyyədə təmin olunması üçün siyasi iradə nümayiş etdirilir. Hazırda ölkədə 4300-dən artıq kütləvi informasiya vasitəsi qeydiyyata alınıb. Regionda ən azad mətbuatlardan biri bizim ölkəmizdədir”.

Mili Televiziya və Radio Şurasının sədri Nuşirəvan Məhərrəmli isə əlavə edib ki, bu gün ölkədə KİV-in problemi daha çox peşəkarlıqla bağlıdır. Onun sözlərinə görə, peşəkarlığın təmin olunması bir sıra çatışmazlıqları aradan qaldıra bilər: “Son illər dövlətin dəstəyi ilə həyata keçirilən bir sıra layihələr mətbuatın inkişafına böyük dəstək olub”.

mətbuat_şura