Media

Ana səhifə

Media

“Azərbaycanda ifadə azadlığı” mövzusunda dəyirmi masa keçirilib

03 may 2010 13:19 (UTC +04:00)

Bakı. Kəmalə Quliyeva – APA. Yeni Nəsil Jurnalistlər Birliyi, İfadə Azadlığı Komitəsi və ARTİCLE 19 təşkilatı 3 may – Beynəlxalq İfadə Azadlığı Günü ilə bağlı “Azərbaycanda ifadə azadlığı” mövzusunda dəyirmi masa keçirib. APA-nın məlumatına görə, konfransda çıxış edən ARTİCLE 19 təşkilatının Avropa üzrə baş proqram rəhbəri Natali Losekut bildirib ki, Azərbaycan BMT-nin insan haqları deklarasiyasını ratifikasiya edən 52 ölkədən biridir. Deklarasiyanın 19-cu maddəsi ifadə azadlığının qorunması ilə bağlıdır. Azərbaycanda “İnformasiya əldə etmək haqqında” qanunun qəbulunu müsbət addım kimi dəyərləndirən N. Losekutun sözlərinə görə, qanun real həyatda işləməli, dövlət qurumları qanunun tələblərindən irəli gələn açıqlıq, şəffaflıq mədəniyyəti həyata keçirməlidirlər.

Azərbaycan Jurnalistlər Birliyinin sədri Elçin Şıxlı isə bildirib ki, ölkədə söz azadlığı ilə bağlı qanun olsa da, əsas problem qanunun icrası ilə bağlıdır: “Hələ də bu qanundan tam faydalana bilmirik. İfadə azadlığı tək qəzetdə hansısa yazını yazmaqla, televiziyada veriliş hazırlamaqla bitmir. Ümid edirik ki, nəhayət parlament “Diffamasiya haqqında” qanunu müzakirə edəcək. Bəziləri belə güman edirlər ki, bu qanun qəbul edilsə, yalan və böhtana görə cəza olmayacaq. Jurnalist yazdığına və söylədiyinə görə məsuliyyət daşımalıdır. Amma cəmiyyətdə dözümlülük də kifayət qədər olmalıdır”.

Son zamanlar Azərbaycanda internetin yüksək sürətlə inkişaf etdiyi deyən media eksperti Ələsgər Məmmədli isə bildirib ki, artıq internet üzərindən də səsli və video məhsulların yayılmasına nəzarət etmək cəhdləri göstərilir: ”Ölkə telekanallarına əhalinin cəmi 12-15 faizi baxır. Azərbaycanda əhali əsas xəbər mənbəyi kimi internetdən istifadə edir. Bir növ internet əhalinin informasiya plüralizminə olan ehtiyacını ödəyir. Buna görə də internetə nəzarətin gücləndirilməsi cəhdləri əngəllənməlidir”.