Media

Ana səhifə

Media

Somalidə jurnalist qətlə yetirilib

06 may 2010 10:02 (UTC +04:00)

Bakı-APA. Somalinin “Radio Moqadişu” radiostansiyasında çalışan jurnalist Şeyx Nur Məhəmməd Abkey Moqadişida silahlı şəxslər tərəfindən qətlə yetirilib. Bu barədə APA-ya Beynəlxalq Mətbuat İnstitutuna (BMİ) istinadən BMİ-nin Azərbaycan Milli Komitəsinin rəhbəri Umud Rəhimoğlu məlumat verib. Onun sözlərinə görə, Abkey səhər Moqadişidəki Bakara bazarına gedərkən silahlı şəxslər tərəfindən oğurlanıb. Jurnalisti oğurlayan şəxslər “Radio Moqadişu”nun baş redaktoru Məhəmməd Olad Hassana zəng edib Abkeyin onların əlində olduğunu və onu öldürməyi planlaşdırdıqlarını deyiblər. Daha sonra redaktora zəng edib jurnalistin öldürüldüyünü bildiriblər.
Bununla bağlı Somali Jurnalistlərinin Milli İttifaqının bəyanatı yayılıb. Bəyanatda 52 yaşlı Abkeyin dövlətin nəzarətində olan və “Əl Şəbəb” və “Hizbul İslam” qiyamçı qruplarını kəskin tənqid edən “Radio Moqadişu”da işlədiyinə görə islamçı qiyamçılar tərəfindən qətlə yetirilməsinin güman olunduğu bildirilir. BMİ direktoru Devid Dədc deyib: “Biz Şeyx Nur Məhəmməd Abkeyin qəddarcasına qətlə yetirilməsini pisləyirik. Bu qətl ilk növbədə insan həyatının, eyni zamanda isə təcrübəli jurnalistlərə indi daha çox ehtiyacı olan ölkədə təcrübəli bir jurnalistin vəhşicəsinə məhv edilməsidir. BMİ bu konfliktdə bütün tərəfləri bütün kütləvi informasiya vasitələrindən olan jurnalistlərə hücum etməyi və onları qətlə yetirməyi dayandırmağa və sülhün yaradılmasında onların işinin əhəmiyyətinə hörmət etməyə çağırır”.
Qeyd edək ki, Abkey bu il Somalidə qətlə yetirilən ilk jurnalistdir. Keçən il isə müharibədən əziyyət çəkən bu Qərbi Afrika ölkəsində 9 jurnalist qətlə yetirilib.

Somali