Media

Ana səhifə

Media

Qabil Abbasoğlu: “Lent.az”ı Azərbaycanın ən böyük media strukturu kimi görmək istəyirəm” - MÜSAHİBƏ

Qabil Abbasoğlu: “Lent.az”ı Azərbaycanın ən böyük media strukturu kimi görmək istəyirəm” - <font color=red>MÜSAHİBƏ</font>

25 iyun 2010 13:03 (UTC +04:00)

Bakı. İlhamə İsabalayeva - APA. “Lent.az” İnformasiya Agentliyinin baş direktoru Qabil Abbasoğlunun APA-ya müsahibəsi

- 2 yaşlı “Lent.az” nəyə nail olub?

- “Lent.az”ın yaranması Azərbaycanda internet medianın yeni təşəkkül tapdığı dövrə təsadüf edib. Zənnimcə, buna görə də Azərbaycanda “Lent.az”ın tərcümeyi-halını ciddi internet mediasının tərcümeyi-halı ilə bir qədər eyniləşdirmək olar. Çünki Azərbaycanda internet mediası təqribən 2 il əvvəl yaranmağa başlayıb. “Lent.az”ın yaranması təşəbbüsü mənə Vüsalə Mahirqızı tərəfindən gəldi və biz çox düşünmədən fəaliyyətə başladıq. Zənnimcə, ilk aylarından, hətta ilk günlərindən “Lent.az” fərqli bir tərz ortaya qoymağı bacardı. Həm yaradıcı, həm də texniki heyətimiz yaxşı formalaşmış olduğu üçün ortaya yaxşı məhsul qoya, oxucuların sevgisini qazana bildik.

- “Lent.az”ın bugünkü səviyyəsi sizi qane edirmi?

- Əlbəttə, istənilən səviyyə mütləq deyil. Bundan daha yaxşısını yaratmaq mümkündür. Bu baxımdan əlbəttə ki, qane etmir. Amma Azərbaycan mediasının indiki reallıqları və standartları baxımından “Lent.az”ın peşəkar, bacarıqlı jurnalistlərdən ibarət kollektivi var. Ortaya çıxardığımız məhsulların əksəriyyətindən razıyam. Amma əsas bizim deyil, oxucuların, media ekspertlərinin, peşəkar insanlarımızın, müəllimlərimizin qiymətidir. Mən hələ ki, saydığım bu tərəflərin hər birindən müsbət rəy eşidirəm.

- “Lent.az” daha çox şou xarakterli məlumatlara üstünlük verir. Bu, oxucuların istəyidir?

- Məsələ ondadır ki, yarandığımız ilk dövrlərdə bu olub. Bir mərhələdə şou-biznes, maqazin tipli xəbərlər, materiallar üstünlük təşkil etdi. Amma bu, qısa mərhələ oldu. Ondan sonra belə hal olmadı. Mən bunu çox ciddi nəzarət altında saxlayıram, sonralar da bu balans pozulmayıb. Şou-biznesin xeyrinə isə ümumiyyətlə, pozulmayıb, əksinə maqazin tipli materialların daha çox olmamasına və üstün mövqelərdə yerləşdirilməməsinə çalışırıq. Çünki özümüz də hiss edirik və apardığımız araşdırmalar da göstərir ki, oxucularımızın tərkibində ciddi materiallara üstünlük verənlərin sayı artır. Təxminən 10 gün əvvəlki statistikanı deyə bilərəm. Həmin vaxt şou-biznesə aid xəbər İsrail-Türkiyə münasibətlərinə dair xəbərlərdən daha az oxundu. Bizdə Türkiyə-Ermənistan münasibətləri, Qarabağla bağlı danışıqların gedişinə aid mühüm xəbərlər, İsraillə bağlı informasiyalar, Azərbaycanın özünün siyasi həyatı ilə bağlı məlumatlar janrından asılı olmayaraq, yaxşı oxunur. Son 6-7 ayda belə məlumatların oxunma sayı artıb.

- “Lent.az”da kollektivə hansısa qadağalar var?

- Xeyr, “Lent.az”da heç bir qadağa yoxdur. Heç kimə, heç bir müəllifə, köşə yazarına heç bir sahədə, heç bir mövzuda qadağa qoyulmayıb. Sadəcə olaraq, hamıya bir hədd elan olunub. Bu hədd nədir? Materialın tonu jurnalistikanın tələb etdiyi formada olmalıdır. Biz heç kimin üstünə qışqırmırıq, heç kimi hədələmirik, heç kimə yalvarmırıq, heç kimdən qorxmuruq, heç kimi də qorxutmuruq. Biz hər gün, hər dəqiqə oxucu ilə müntəzəm, sakit və xəbərlə dolu bir söhbət aparırıq.

- “Lent.az” gələcəkdə oxucularına necə təqdim ediləcək?

- 1 yaşımız olanda mən bildirmişdim ki, “Lent.az”ı Azərbaycan mediasında hadisə adlandırmaq olar. Bu fikri yenə də təkrarlayıram. “Lent.az” Azərbaycan mediasında hadisədir. “Lent.az” iki il ərzində ənənəvi qəzetçilikdən fərqli, daha sanballı materiallar ortaya çıxarmağa nail ola bilib. İki il çox qısa müddətdir. Azərbaycanda 20-25 yaşı olan qəzetlər var. Onlarla rəqabətdə işləmək əlbəttə, asan məsələ deyil. Amma gələcək üçün strategiyamız konkret elan olunmasa da, hər kəs, şəxsən mən “Lent.az”ı Azərbaycanın ən böyük media strukturu kimi görmək istəyirəm. Bunun üçün nə tələb olunursa, etməyə çalışırıq. Bütün kollektiv, rəhbərlik, xüsusilə Vüsalə Mahirqızı, zənnimcə, “Lent.az”ın perspektivini yüksək qiymətləndirir.

lent.az