Media

Ana səhifə

Media

Zərdabda «Azərbaycan milli mətbuatı 135: tarixi nailiyyətlər və perspektivlər» mövzusunda konfrans keçirilib - FOTO

Zərdabda «Azərbaycan milli mətbuatı 135: tarixi nailiyyətlər və perspektivlər» mövzusunda konfrans keçirilib - <font color=red>FOTO</font>

01 iyul 2010 14:21 (UTC +04:00)

Zərdab. Zahid Abışov – APA. Bu gün Zərdab rayonunda «Azərbaycan milli mətbuatı 135: tarixi nailiyyətlər və perspektivlər» mövzusunda konfrans keçirilib. APA-nın yerli bürosunun xəbərinə görə, Azərbaycan milli mətbuatının 135 illik yubileyinə həsr olunmuş mərasimin iştirakçıları öncə Heydər Əliyevin və Həsən bəy Zərdabinin abidəsini ziyarət ediblər. Daha sonra onlar Həsən bəy Zərdabinin ev muzeyinə baş çəkərək oradakı eksponatlarla tanış olublar.
Konfransı açan Zərdab rayon İcra Hakimiyyətinin başçısı Lütfəli Babayev Həsən bəy Zərdabi irsinə verilən önəmin nümunəsi olan tədbirin təşkilatçılarına təşəkkürünü bildirib.
Mətbuat Şurasının sədri Əflatun Amaşov «Azərbaycan milli mətbuatı 135: tarixi nailiyyətlər və perspektivlər» mövzusunda məruzə edib. Şura sədri məruzəsində Azərbaycanda medianın inkişafına dövlət qayğısının bariz tendensiyaya çevrildiyini vurğulayıb, bu məqsədlə müxtəlif illərdə həyata keçirilən məqsədyönlü tədbirləri də xarakterizə edib.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli rəhbərlik etdiyi qurumun fəaliyyət istiqamətlərindən danışıb. O, 2009-cu ilin mayından işə başlayan Fondun ötən müddətdəki təcrübəsinin media ilə bağlı əhatəli proqramların işlənib hazırlanması üçün əsas yaratdığını önə çəkib.

Mətbuat Şurası sədrinin müavini, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədri Umud Rəhimoğlu, Mətbuat Şurasının İdarə Heyətinin üzvü, «İki sahil» qəzetinin baş redaktoru Vüqar Rəhimzadə, Zərdabda çıxan «Əkinçi» qəzetinin redaktoru Üsaməddin Əhmədov tədbirdə çıxış ediblər.
Konfransda Həsən bəy Zərdabi nəslinin nümayəndələri də iştirak ediblər. Onlardan akademik Böyükkişi Ağayev Həsən bəyin və onun övladlarının ömür yolu barədə ətraflı məlumat verib.

Prezident Administrasiyasının ictimai-siyasi məsələlər şöbəsinin sektor müdiri Vüqar Əliyev Azərbaycanda media sahəsindəki dövlət siyasətinin prioritetlərini qeyd edib. O, prezident İlham Əliyevin milli mətbuatın 135 illik yubileyinin keçirilməsi barədə 10 iyun 2010-cu il tarixli sərəncamı ilə əlaqədar tədbirlər planı haqqında məlumat verərək sənəddən irəli gələn digər vəzifələrin də belə uğurla icra ediləcəyinə əminliyini bildirib.