Media

Ana səhifə

Media

Azərbaycan Jurnalistlərinin Peşə Davranışı Qaydalarına təklif olunan əlavə və düzəlişlər müzakirə edilib

12 avqust 2010 13:59 (UTC +04:00)

APA-nın məlumatına görə, Mətbuat Şurasının yeni ofisində keçirilən tədbirdə Azərbaycan Jurnalistlərinin Peşə Davranışı Qaydalarına təklif olunan əlavə və düzəlişlər müzakirə edilib.

Mətbuat Şurasının sədri Əflatun Amaşov təklif edilən əlavə və düzəlişləri şuranın və ATƏT-in Bakı ofisi ekspertlərinin hazırladığını açıqlayıb. O bildirib ki, ATƏT-lə əməkdaşlığın tərkib hissəsi olaraq “Diffamasiya haqqında” qanunun Milli Məclisdə qəbulu üçün birgə səylər göstərilir.

ATƏT-in Bakı ofisinin rəhbəri Əli Bilgə Cankorel qeyd olunan məsələlərlə bağlı hökumət nümayəndələri ilə görüşlər keçirildiyini söyləyib və Mətbuat Şurasının bu istiqamətdə səylərini dəstəklədiklərini vurğulayıb: “Hər cür dəstəyi verməyə hazırıq. Biz Mətbuat Şurasını ölkədəki bütün mətbuatı əhatə edən qurum kimi görmək istəyirik”. Ə. B. Cankorel ATƏT-in söz və mətbuat azadlığı üzrə nümayəndəsi Dunya Miyatoviçin sentyabr ayında Azərbaycana gələcəyini deyib.

Tədbirdə Mətbuat Şurasının üzvü, millət vəkili Aqil Abbas və İREX-in eksperti, hüquqşünas Ələsgər Məmmədli arasında özəl həyatın toxunulmazlığı mövzusunda polemika olub. A. Abbas Konstitusiyaya istinad edərək şəxsi həyatın istənilən halda toxunulmaz olduğunu dilə gətirib, Ə. Məmmədli isə bununla bağlı istisnaların mövcudluğuna diqqət çəkib. Ə. Məmmədlinin sözlərinə görə, şəxsi həyatla qanunsuz hərəkəti eyniləşdirmək olmaz.

“Azərbaycan” qəzetinin baş redaktoru Bəxtiyar Sadıqov bəyan edib ki, Azərbaycan Jurnalistlərinin Peşə Davranışı Qaydalarına Mətbuat Şurasının üzvü olub-olmamasından asılı olmayaraq bütün mətbu qurumlar və jurnalistlər əməl etməlidir. Onun fikrincə, Azərbaycanda peşəkarlıq səviyyəsinin aşağı düşməsi müşahidə olunur.

“Xalq Cəbhəsi” qəzetinin baş redaktoru Elçin Mirzəbəyli qaydalara təklif olunan əlavə və düzəlişləri dəstəklədiyini bildirsə də, qeyd edib ki, vətəndaşlarla mətbuatın hüquqları balanslaşdırılmış və paralel şəkildə qorunmalıdır.

Mətbuat Şurasının üzvü, APA-nın baş direktoru Vüsalə Mahirqızı konkret misallarla təklif edilən bəzi əlavə və düzəlişlərə ehtiyac olmadığını vurğulayıb. Onun sözlərinə görə, informasiya qaynaqlarına sayğı göstərilməlidir, mənbənin açılması isə yalnız məhkəmə yolu ilə ola bilər. V. Mahirqızı təkliflərdə qeyd olunan “hadisə sensasiya xarakterlidirsə, onu verməkdən çəkinmək lazımdır” fikri ilə razılaşmayıb: “Əgər hadisə sensasiyadırsa, onu vermək lazımdır, hamı da o xəbəri verəcək”. O, “jurnalist mənbəyə pul verməməlidir” fikrinə də etiraz edib: “Praktikada jurnalistlər bəzən mənbəyə pul verərək xəbər, müsahibə alır”.

Mətbuat Şurasının hüquqşünası Şəmsəddin Əliyev V. Mahirqızının fikirlərinin bir qismi ilə razılaşıb. O da öz konkret təkliflərini səsləndirib.

Azərbaycan Prezidenti yanında KİV-ə Dövlət Dəstəyi Şurasının sədri Vüqar Səfərli təkliflərin ümumiləşdirilməsi üçün işçi qrup yaradılmasını təklif edib. Təklif qəbul olunub və işçi qrup yaradılıb. Qrupa APA-nın baş direktoru Vüsalə Mahirqızı, “Azərbaycan” qəzetinin baş redaktoru Bəxtiyar Sadıqov, Mətbuat Şurasının hüquqşünası Şəmsəddin Əliyev, “Yeni Müsavat” qəzetinin baş redaktoru Rauf Arifoğlu, İREX-in hüquqşünası Ələsgər Məmmədli, “Xalq Cəbhəsi” qəzetinin baş redaktoru Elçin Mirzəbəyli, MŞ üzvləri Müşfiq Ələsgərli, Aqil Abbas, Umud Rəhimoğlu daxil edilib.

Qeyd edək ki, MŞ və ATƏT-in Bakı ofisi bu ilin martında jurnalistlərin peşə davranışı qaydalarını təkmilləşdirmək və diffamasiya ilə bağlı təşəbbüsləri dəstəkləmək üçün birgə layihəyə başlayıblar. Layihə çərçivəsində bu ay daha bir dəyirmi masanın təşkili nəzərdə tutulur. Sentyabrın ilk ongünlüyündə isə beynəlxalq ekspertlərin də iştirakı ilə konfrans keçirilməsi planlaşdırılır.

peşə_qayda