Media

Ana səhifə

Media

Türkiyəli yazarlar Mətbuat Şurasında olublar - FOTO

Türkiyəli yazarlar Mətbuat Şurasında olublar - <font color=red>FOTO</font>

16 sentyabr 2010 12:51 (UTC +04:00)

Bakı-APA. Bu gün Azərbaycan Mətbuat Şurasının (MŞ) sədri Əflatun Amaşov Türkiyənin Elazığ vilayətinin bir qrup tanınmış yazarlarını qəbul edib. Şuradan APA-ya verilən məlumata görə, şura sədri Respublika Mədəniyyət və Turizm Nazirliyinin, Türkiyənin Azərbaycandakı səfirliyinin, Bakının “Ozan” və Elazığın “Manas” nəşriyyatlarının təşkilatçıları ilə ölkə paytaxtında düzənlənən “Elazığ çələngi” beynəlxalq tədbirinin iştirakçıları olan qonaqları salamlayıb. Ə. Amaşov türkdilli xalqların dövlət başçılarının zirvə toplantısının keçirildiyi ərəfəyə təsadüf edən görüşün əhəmiyyətinə diqqəti çəkərək bildirib ki, dili, dini, adət-ənənəsi bir ölkələr arasında əlaqələrin genişləndirilməsində söz sənəti də körpü rolunu oynayır. MŞ sədri həmin sahədə ədəbiyyat təmsilçiləri ilə yanaşı, jurnalistlərin də yerinə yetirdikləri missiyanın məsuliyyətindən danışıb.

Nümayəndə heyətinin rəhbəri, “Manas” nəşriyyatının direktoru M.Şener Bulud Elazığ vilayətinin Türkiyədə ədəbiyyat və mədəniyyət mərkəzi kimi dəyərləndirildiyini deyib. Qonaq hər bir elazığlının orada türk dünyasının görkəmli yazıçısı Almas İldırımın yaşamasından bu şəhərdə onun və xalq şairi Bəxtiyar Vahabzadənin adlarını daşıyan küçələrin olmasından fəxarət duyduğunu deyib. Sonra vilayət barədə müfəssəl məlumatların yer aldığı “Elazığ çələngi” kitabını MŞ sədri Ə.Amaşova təqdim edilib.

Görüşdə Fırat Universitetinin jurnalistika fakültəsinin professoru Tarık Özcan 20 min tələbənin təhsil aldığı bu ali məktəbin öz televiziya, radio kanalına, qəzetinə malik olmasından söhbət açıb, həmin ixtisas üzrə təhsilə istedadlı və hazırlıqlı gənclərin cəlbi üçün görülən tədbirlərdən danışıb. Universitetin müəllimi Receb Bağçı şair-jurnalistlərdən Midhət Yılmaz (A.İldırımın oğlu), Hadi Önal və Günerken Aydoğmuş hər iki ölkənin yazarları arasındakı ədəbi-bədii əlaqələrdən danışarkın bir sıra rəy və təkliflərini də səsləndiriblər. Sonra qonaqlara Həsən bəy Zərdabinin “Təbiət və insan” kitabı təqdim olunub.