Media

Ana səhifə

Media

Azərbaycan Mətbuat Şurasının Şikayətlər üzrə Komissiyasının iclası keçirilib

24 sentyabr 2010 13:52 (UTC +04:00)

Bakı. Rəşad Süleymanov - APA. Bü gün Azərbaycan Mətbuat Şurasının Şikayətlər üzrə Komissiyasının iclası keçirilib. Mətbuat Şurasının mətbuat xidmətindən APA-ya verilən məlumata görə, Şura sədrinin müavini Müşfiq Ələsgərlinin başçılıq etdiyi komissiyanın üzvləri 4 mətbu nəşrlə bağlı müraciətləri araşdırıb.

Komissiya əvvəlcə Cəlilabad poçt filialının və İmişli rayonunun Bəcirəvan kənd sakini Qismət Cəfərovun «Azadlıq» qəzeti ilə bağlı şikayətlərini müzakirə edib. Qəzetin baş direktoru Azər Əhmədov nəşrin 17 və 27 avqust 2010-cu il tarixli saylarında gedən «Poçt şöbəsində 5 min manat qiyamı» və «İmişlidə prezident fərmanı işləmir» sərlövhəli yazılarla bağlı qarşı tərəfin mövqelərini əks etdirən materialların dərc olunduğu barədə məlumat verib. Qarşı tərəf bunu razılıqla qarşıladığından komissiya məsələləri həll olunmuş sayıb.

Sonra komissiya Bakı Şəhər Baş Polis İdarəsinin «Rəsmi Azərbaycan» qəzetinin əməkdaşı Rövşən Əliyevin peşə etikası ilə bir araya sığmayan hərəkətləri barədə təqdimatına baxıb. R. Əliyev orta təhsilli olmasını, maddi təmənna müqabilində baş redaktor Ruslan Cabbarovdan qəzetin vəsiqəsini almasını və dərc etdiyi hər yazının müqabilində mətbu nəşr rəhbərinə pul ödədiyini bildirib. Komissiya bu kimi hallar peşə fəaliyyəti ilə bir araya sığmadığından «Rəsmi Azərbaycan» qəzeti ilə bağlı məsələnin Mətbuat Şurasının «Reket jurnalistika»ya qarşı mübarizə Komissiyasında araşdırılmasını vacib sayıb.

Komissiyada «Bizim dövr» qəzeti ilə bağlı 3 şikayətə baxılıb. Belə rəyə gəlinib ki, qəzetin Sumqayıt Ruhi-Əsəb Xəstəlikləri Dispanseri, Şəki Şəhər Qarışıq Tipli Uşaq Müəssisəsi, Mil- Qarabağ və Aşağı Şirvan Kollektorları İstismarı İdarəsi ilə bağlı və digər şikayət doğuran yazılarında «Azərbaycan Jurnalistlərinin Peşə Davranışı Qaydaları»nın tələblərinə dəfələrlə sayğısızlıq göstərilib. Nəşrin fəaliyyətində peşə prinsipləri ilə bir araya sığmayan digər hallar da üstünlük təşkil etdiyindən Şuranın «Reket jurnalistika»ya qarşı mübarizə Komissiyasına həmin mətbu orqanla əlaqədar müvafiq araşdırma aparmaq tövsiyyə olunub. Həmçinin qəzetlə bağlı Şuraya daxil olan şikayətlərdə hüquq-mühafizə orqanlarının araşdırmalı olduğu halların üstünlük təşkil etdiyi nəzərə alınaraq həmin materialların müvafiq orqanlara göndərilməsi qərara alınıb.

Komissiya Bakı şəhər sakinləri Zoya Hüseynovanın, Çimnaz Hüseynovanın və başqalarının «Məhkəmə və qanun» qəzeti ilə bağlı müraciətlərinə də baxıb. Bu məsələlərin də motivində hüquq-mühafizə orqanlarının araşdırmalı olduğu cəhətlərin olduğu nəzərə alınaraq Komissiya bütün toplanmış materialların aidiyyatı üzrə göndərilməsi barədə rəy çıxarıb.