Media

Ana səhifə

Media

Mətbuat Şurası İdarə Heyətinin iclası keçirilib - FOTO

Mətbuat Şurası İdarə Heyətinin iclası keçirilib - <font color=red>FOTO</font>

14 oktyabr 2010 15:00 (UTC +04:00)

Bakı-APA. Bu gün Azərbaycan Mətbuat Şurası (MŞ) İdarə Heyətinin (İH) iclası keçirilib. Şuradan APA-ya verilən məlumata görə, MŞ sədri Əflatun Amaşov gündəliyi İH üzvlərinin müzakirəsinə təqdim edib. İclasda 5 məsələnin müzakirəsi qərarlaşdırılıb.
Toplantıda öncə ali məktəblərin jurnalistika fakültələrinə qəbul zaman qabiliyyət imtahanlarının bərpası məsələsi müzakirə olunub. Ə. Amaşov rəhbərlik etdiyi qurumun hazırda bu istiqamətdə araşdırmalar apardığını və dünyanın bir çox ölkələrindəki qabaqcıl təcrübənin nəzərdən keçirildiyini vurğulayıb.

Məsələnin aktuallığını nəzərə alınaraq bununla əlaqədar şurada xüsusi İşçi Qrupu yaradılıb.
Müəyyənləşdirilib ki, Avropanın, eləcə də dünyanın əksər ölkələrində jurnalistika fakültələrinə qabiliyyət imtahanları çox uğurla həyata keçirilir və bu, müsbət nəticələr verir.
Daha sonra «Şabran» qəzeti və «Olimp sport» jurnalı MŞ üzvlüyünə qəbul olunub.

Şuranın Şikayətlər üzrə Komissiyasının təqdim etdiyi rəylər əsasında MŞ-nin qərarlarının qəbulu zamanı məsələyə iki kontekstdən yanaşılması məqbul sayılıb. İlk növbədə komissiyanın çıxardığı rəylər dəyərləndirilib. Belə razılığa gəlinib ki, Masallı rayonundan bir qrup ziyalının «Cənub xəbərləri» və Ağdam rayonundan bir qrup sakinin «Qeyrət qalası» regional qəzetləri ilə bağlı şikayətləri əsaslıdır. Hər iki KİV-ə etik prinsiplərin tələblərinə sayğısız yanaşdığına görə Mətbuat Şurasının xəbərdarlığının elan olunması məqsədəuyğundur. Eyni qərar «Milli hərəkat» qəzeti barədə də çıxarılıb.

Komissiyanın Cəlilabad Post filialının və İmişli rayonunun Bəcirəvan kənd sakini Q.Cəfərovun şikayətləri əsasında çıxardığı rəylər məqbul qiymətləndirilib və belə qərara alınıb ki, «Azadlıq» qəzeti cavabdeh tərəf kimi şikayətçilərin mövqeyini əks etdirən məktublarını dərc etdiyindən məsələ həllini tapmış sayıla bilər.
İH digər 5 qərarın qəbulunda Şuranın «Reket jurnalistika»ya qarşı mübarizə Komissiyasının 28 sentyabr tarixli iclasının rəylərini əsas götürüb. «Rəsmi Azərbaycan» və «Vedi inform» qəzetlərinin adları Şuranın «qara siyahı»sına salınarkən bu nəşrlərin əməkdaşlarının yol verdikləri hüquqa zidd hərəkətlərə istinad edilib. Eyni zamanda nəzərə alınıb ki, bu KİV-də jurnalist adından sui-istifadə halları üstünlük təşkil edir. Oxşar motivlər «Həftəlik Azərbaycan» və «Azad yeni fikir» qəzetlərinin də «qara siyahı»ya salınmasına səbəb olub.

«Bizim dövr» qəzeti ilə bağlı məsələnin müzakirəsi zamanı bildirilib ki, bu nəşr Şuranın «qara siyahı»sında yer alan «Yeni dövr» qəzetinin yolunu davam etdirir. Bildirilib ki, birincinin təsisçisi və baş redaktoru Hikmət Nəcəfli ikincidə də eyni postları tutur.
İH bu KİV-in adının «qara siyahı»ya salınması ilə bağlı qərar qəbul etməklə yanaşı, mətbu orqan barəsində toplanmış materialların inzibati orqanlara göndərilməsini məqsədəuyğun sayıb.

Şuranın «qara siyahı»sındakı bəzi qəzetlərin peşə prinsiplərinə zidd fəaliyyətlərini davam etdirdikləri narahatlıqla vurğulanıb. Təklif edilib ki, bu kimi halların qarşısının alınması üçün hüquq-mühafizə orqanları ilə birgə əməkdaşlıq gücləndirilsin.

Tədbirdə eyni zamanda Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun xətti ilə Türkiyə və Şimali Kiprdə təcrübə mübadiləsinə yollanacaq jurnalistlərin tərkibinin müəyyənləşdirilməsinə dair fikir mübadilələri aparılıb.