“Human Rights Watch” Azərbaycanda ifadə azadlığına dair hesabatını açıqlayıb

“Human Rights Watch” Azərbaycanda ifadə azadlığına dair hesabatını açıqlayıb
# 26 oktyabr 2010 12:45 (UTC +04:00)
Bakı. Laçın Sultanova – APA. “Human Rights Watch” təşkilatı Azərbaycanda ifadə azadlığına dair hesabatını açıqlayıb. APA-nın məlumatına görə, bununla bağlı keçirilmiş mətbuat konfransında təşkilatın Avropa və Mərkəzi Asiya üzrə direktor müavini Reyçil Denber bildirib ki, onlar Azərbaycanda 2007-ci ildən fəaliyyət göstərirlər.

R. Denber deyib ki, onlar hesabatı hazırlayarkən 40-dan çox jurnalist və KİV rəhbəri ilə, bu sahədə təcrübəsi olan insanlarla, həmçinin hökumət nümayəndələri ilə müsahibələr aparıblar.

Hesabat 94 səhifədən ibarətdir, orada Azərbaycanda ifadə azadlığı ilə bağlı problemlər sadalanıb və hökumətə tövsiyələr əksini tapıb.

R. Denber qeyd edib ki, hesabatda əsasən Eynulla Fətullayevin və bloggerlər Emin Milli ilə Adnan Hacızadənin azadlığa buraxılması ilə bağlı məsələ qeyd olunub.

Azərbaycanda “Diffamasiya haqqında” qanunun qəbulu ilə bağlı məsələnin həllini tapacağına ümid etdiyini deyən R. Denber prezident İlham Əliyevin bu ilin iyul ayında Mətbuat Şurası üzvləri ilə görüşdə bu qanunun qəbulunu alqışlayacağını söylədiyini də xatırladıb.

“Human Rights Watch”ın Qafqaz üzrə tədqiqatçısı Georgiy Qoqia isə Azərbaycanın Avropa Şurası qarşısında üzərinə götürdüyü öhdəliklərdən danışıb. Tədqiqatçı bildirib ki, media azadlığı sahəsində müəyyən məhdudiyyətlərin olması mümkündür: “Bu məhdudiyyətlər insanların hüquqlarının qorunması və dövlət təhlükəsizliyi baxımından olmalı, qanunvericilikdə əksini tapmalıdır”.
#
#

ƏMƏLİYYAT İCRA OLUNUR