Media

Ana səhifə

Media

Mətbuat Şurasında qocaman jurnalist Çingiz Ələkbərovun 85 illik yubileyi qeyd olunub - FOTO

Mətbuat Şurasında qocaman jurnalist Çingiz Ələkbərovun 85 illik yubileyi qeyd olunub - <font color=red>FOTO</font>

03 noyabr 2010 08:23 (UTC +04:00)

Bakı-APA. Azərbaycan Mətbuat Şurasında (MŞ) qocaman jurnalist Çingiz Ələkbərovun 85 illik yubileyi ilə bağlı mərasim keçirilib. Şuradan APA-ya verilən məlumata görə, MŞ-nin Ahıl Jurnalistlər Məclisi tərəfindən düzənlənən tədbiri açan qurumun sədri Əflatun Amaşov yubilyarı təbrik edərək onun həyat və yaradıcılığının müasir Azərbaycan jurnalistikası üçün örnək olduğunu vurğulayıb. Şura sədri bildirib ki, Böyük Vətən Müharibəsinin iştirakçısı olmuş Ç.Ələkbərov ensiklopedik biliyə malik zəka sahiblərindəndir. Yubilyarın indinin özündə də aktiv fəaliyyətdə olduğunu deyən Ə.Amaşov onun Mərkəzi Seçki Komissiyasının Katibliyinin müdiri kimi məsul vəzifənin öhdəsindən layiqincə gəldiyini vurğulayıb.
Şura sədri Ç.Ələkbərova MŞ-nin təbrik plaketini təqdim edib: «Çingiz müəllimin milli mətbuatımızın inkişafındakı, eləcə də dövlət qurumları ilə media arasında əlaqələrin tənzimlənməsi sahəsində xidmətləri çox böyükdür».

MŞ-nin Ahıl Jurnalistlər Məclisinin sədri, əməkdar jurnalist Yusif Kərimov yubilyarın «Bakı»-«Bakı» qəzetindəki fəaliyyətindən söhbət açıb.

MŞ İdarə Heyətinin üzvü, «İki sahil» qəzetinin baş redaktoru Vüqar Rəhimzadə, «Xalq qəzeti»nin baş redaktor müavini Tahir Aydınoğlu, nəşrin əməkdaşı Qüdrət Piriyev, qocaman jurnalistlərdən Arif Hüseynov, Şəddad Cəfərov, Ələsgər Cabbarov və başqaları Ç.Ələkbərovun həyat və yaradıcılığından, onunla bağlı xatirələrdən danışıblar.

Sonda çıxış edən Ç.Ələkbərov əməyinə verilən qiymətə görə tədbir iştirakçılarına təşəkkürünü bildirib. Yubilyar taleyini jurnalistika ilə bağlamasından qürur hissi keçirdiyini deyib. Ç.Ələkbərov Mərkəzi Seçki Komissiyası ilə KİV arasındakı əlaqələrin səciyyəvi xüsusiyyətlərindən də bəhs edib.
Qeyd edək ki, Çingiz Hacıbaba oğlu Ələkbərov 1925-ci ildə Bakıda anadan olub. Bakı Dövlət Universitetinin filologiya fakültəsini bitirib. 1943-1945-ci illərdə Böyük Vətən Müharibəsinin iştirakçısı olub. Müharibədən sonra müxtəlif yüksək vəzifələr tutan jurnalist 1958-ci ildə «Bakı» qəzetində fəaliyyətə başlayıb. 1966-1992-ci illərdə Azərbaycan Respublikası Ali Soveti Rəyasət Heyətinin Dövlət quruculuğu şöbəsinin müdir müavini işləyib, sonra Milli Məclis Aparatının nəşr və tərcümə şöbəsinə rəhbərlik edib. 1992-ci ildən Mərkəzi Seçki Komissiyasının aparatında çalışır. 1995-ci ildən MSK Katibliyinin müdiridir.