Media

Ana səhifə

Media

KİV layihələrinin maliyyələşdirilməsi ilə bağlı növbəti müsabiqə elan olunub

25 noyabr 2010 13:38 (UTC +04:00)

Bakı. Rəşad Süleymanov – APA. Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu KİV layihələrinin maliyyələşdirilməsi ilə bağlı növbəti müsabiqə elan edib. Bu barədə APA-ya Fonddan məlumat verilib. Fondun Müşahidə Şurasının rəyi əsasında hər il olduğu kimi, bu dəfə də 19 istiqamət üzrə layihələrin maliyyələşdirilməsi həyata keçiriləcək.

Müsabiqədə son 1 ildə müntəzəm nəşr olunan, dövriliyi həftədə 1 dəfədən və tirajı 1500 nüsxədən az olmayan, hər buraxılışından ən azı 500 nüsxəsi satılan və ya abunə yolu ilə yayılan qəzetlər, son 1 ildə müntəzəm olaraq ayda 1 dəfə nəşr olunan, tirajı 500 nüsxədən az olmayan, hər buraxılışından ən azı 300 nüsxəsi satılan və ya abunə yolu ilə yayılan jurnallar iştirak edə bilər.

Hər layihə üçün maksimum məbləğ 40 min manat müəyyən edilib və hər KİV bir layihə təqdim edə bilər. Ümumilikdə hər istiqamət üzrə 3 layihənin maliyyələşdirilməsi nəzərdə tutulur.

Ərizələr noyabrın 26-dan dekabrın 25-dək, rəsmi iş günləri saat 10:00-dan 16:00-dək Fondun ofisində qəbul olunur. Nəticələr dekabrın 30-dək elan ediləcəkdir.