Media

Ana səhifə

Media

Mətbuat Şurasında Türkiyənin media təmsilçilərindən ibarət nümayəndə heyəti ilə görüş keçirilib - FOTO

Mətbuat Şurasında Türkiyənin media təmsilçilərindən ibarət nümayəndə heyəti ilə görüş keçirilib - <font color=red>FOTO</font>

01 dekabr 2010 14:57 (UTC +04:00)

Bakı-APA. Bu gün Azərbaycanda səfərdə olan Türkiyənin media təmsilçilərindən ibarət nümayəndə heyəti Azərbaycan Mətbuat Şurasında olub. Şuradan APA-ya verilən məlumata görə, nümayəndə heyətinin tərkibinə Türkiyə Cümhuriyyəti Başbakanlığı Mətbuat Yayım – İnformasiya baş direktoru Murat Karakaya, qurumun təmsilçiləri Bahəddin Akyön, Abdullah Uzun, İsmail Kozan, həmçinin TRT-nin təmsilçiləri, Türkiyənin nüfuzlu ali məktəblərinin jurnalistika fakultələrinin mütəxəssisləri daxildir. Azərbaycan Mətbuat Şurasının sədri Əflatun Amaşov Türkiyə və Azərbaycan mediası arasındakı əlaqələrin tarixindən söhbət açıb. Bildirib ki, Azərbaycan ictimai fikri həmişə ümumtürk ictimai fikrindən qidalanıb: “Əli bəy Hüseynzadə, Əhməd Ağaoğlu, Ziya Göyalp kimi müştərək dühalarımız var”.
Ə.Amaşov gənc müstəqil dövlət olan Azərbaycanın Türkiyə ilə münasibətlərində media faktorunu önə çəkib. Onun sözlərinə görə, hər iki ölkənin mediası müasir dövrdə bir sıra tarixi sınaqlardan üzüağ çıxmağı bacarıb. Müxtəlif siyasi proseslərə, o cümlədən Türkiyə və Azərbaycan arasındakı əlaqələrə maneə olan qüvvələrə qarşı ortaq mövqe nümayişini bacarıb.

Türkiyə mediasının Qərb mediasının mühüm tərkib hissəsi olduğunu deyən Şura sədri onun təcrübəsinin öyrənilməsinin və tətbiqinin zəruri olduğunu önə çəkib.

MŞ sədri hər iki ölkənin media sahəsindəki əlaqələrinin dərinləşməsində, səmərəli əməkdaşlığın qorunmasındakı xidmətlərinə görə Türkiyə Cümhuriyyəti Başbakanlığı Mətbuat Yayım - İnformasiya baş direktoru Murat Karakayanı Azərbaycan Mətbuat Şurasının xüsusi diplomu ilə təltif edib. Mətbuat Şurasına təşəkkürünü bildirən M. Karakaya Azərbaycana hər bir səfərin böyük əhəmiyyət daşıdığını bildirib. O deyib ki, müxtəlif sahələrdə birgə uğurlu nəticələr əldə edən ölkələrin media sahəsində də əməkdaşlığının sistemli xarakter alması zəruridir. Qarşılıqlı əlaqələrin mövcud durumuna toxunan M.Karakaya təmsil olunduğu qurumun təcrübəsinin Azərbaycan mediasında daha yaxından tətbiqi üçün zəruri tədbirlərə dəstək göstəriləcəyini vurğulayıb.

Görüşdə ikitərəfli əməkdaşlığın müxtəlif aspektlərinə dair fikir mübadilələri aparılıb.