Media

Ana səhifə

Media

Bakıda Türkiyə mətbuatının təcrübəsinə həsr olunmuş seminar keçirilib - FOTOSESSİYA

Bakıda Türkiyə mətbuatının təcrübəsinə həsr olunmuş seminar keçirilib - <font color=red>FOTOSESSİYA</font>

02 dekabr 2010 12:32 (UTC +04:00)

APA-nın məlumatına görə, seminarda Azərbaycan Prezident Administrasiyası ictimai-siyasi şöbəsinin müdiri Əli Həsənov, Türkiyə Nazirlər Kabinetinin, TRT-nin, Azərbaycan Milli Televiziya və Radio Şurasının, Mətbuat Şurası, Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təmsilçiləri, yerli mətbuat orqanlarının baş redaktorları və digər şəxslər iştirak ediblər.

Tədbirdə çıxış edən Türkiyə səfirliyinin mətbuat müşaviri Həmid Kaya bildirib ki, Azərbaycan universitetlərinin jurnalistika fakültələrinin tələbələri üçün Türkiyədə təcrübə kurslarının təşkili ilə bağlı layihənin həyata keçirilməsi nəzərdə tutulur. Bununla bağlı Mətbuat Şurası ilə müzakirələr aparılacaq.

Mətbuat Şurasının sədri Əflatun Amaşov isə Azərbaycan və Türkiyə mətbuatının əlaqələrindən danışıb. Azərbaycan müstəqillik əldə edəndən sonra Türkiyə mətbuatının Dağlıq Qarabağ münaqişəsinin işıqlandırılmasında mühüm rol oynadığını vurğulayıb.

Azərbaycanda medianın inkişaf etdiyini deyən Türkiyə Nazirlər Kabinetinin Mətbuat-yayım və informasiya şöbəsinin baş direktoru Murat Karakaya isə iki ölkənin media qurumları arasında təcrübə mübadilələrinin təşkilinə ehtiyac duyulduğunu deyib: «Azərbaycan və Türkiyənin ortaq problemləri var. Bu problemlərin həlli baxımından media bir araya gələ bilər».

Azərbaycan Prezident Administrasiyası ictimai-siyasi şöbəsinin müdiri Əli Həsənov isə çıxışında iki ölkənin mediasının mövcud vəziyyətinə toxunub. Türkiyə və Azərbaycanın eyni dəyərlərə malik olduğunu söyləyən PA rəsmisi qeyd edib ki, məhz bu ortaqlıq dünya mətbuatında onları fərqləndirir: «Biz çalışmalıyıq ki, bu dəyərlər hansısa təsirlərdən asılı etməyək. Təəssüf ki son zamanlar Azərbaycan və Türkiyə arasında münasibətlərə təsir göstərmək üçün qlobal mərkəzlər yaradılır. Biz medianın müştərək tədbirləri nəticəsində milli dəyərləri qlobal təsirlərdən azad edə bilərik».

Ə. Həsənov bəzi məsələlərdə Azərbaycan və Türkiyə mediasının birgə çıxış etməsinə zərurət olduğunu vurğulayıb: «Atatürk Avropa üçün başağrısına çevrilən dövlət yaradıb. Ona görə də Avropa Atatürkün üzərinə gələ bilər. Onu qorumaq isə Türkiyə mediasının borcudur. O cümlədən Heydər Əliyevi qorumaq».

Türkiyənin Azərbaycandakı səfiri Hülusi Kılıc çıxışında bu tip əhəmiyyətli tədbirlərin davam etdirilməsinə tərəfdar olduğunu vurğulayıb.

Seminarda daha sonra qəzet və jurnallarda səhifə dizaynı, televiziya xəbərçiliyi və televiziyada reportaj texnikaları, görüntülü xəbər vermə texnikaları, video-reportajların hazırlanmasındakı son inkişaflar, Türkiyə və dünyada mediada reklam, Türkiyə Mətbuat Elan Təşkilatı və rəsmi elanlar, Türkiyədə mətbuatla dövlət təşkilatları arasındakı problemlərin həlli yolları mövzularında məruzələr oxunulub.