Media

Ana səhifə

Media

Dünya Azərbaycanlılarının Həmrəylik Günü və Yeni il münasibətilə keçirilən fərdi jurnalist yazıları müsabiqəsinin nəticələri açıqlanıb - FOTO

16 dekabr 2010 15:30 (UTC +04:00)

Bakı. Ramil Məmmədli – APA. Azərbaycan Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) Müşahidə Şurasının iclası keçirilib. Bu barədə APA-ya Fonddan məlumat verilib. İclasda iki məsələ - Dünya Azərbaycanlılarının Həmrəylik günü və Yeni təqvim ili münasibətilə keçirilən fərdi jurnalist yazıları müsabiqəsinin nəticələri və KİV-in maddi-texniki bazasının gücləndirilməsi məqsədilə birdəfəlik yardımların edilməsi məsələlərinə baxılıb.

Birinci məsələ ilə bağlı Müşahidə Şurası üzvlərinə məlumat verən KİVDF-nin icraçı direktoru Vüqar Səfərli bildirib ki, 18 istiqamət üzrə elan edilən müsabiqəyə ümumilikdə 74 nəfər jurnalist qatılıb. Hər istiqamət üzrə 3 yazının (2 nəfər respublika miqyaslı KİV redaksiyalarında çalışanlar üçün, 1 nəfər isə region mətbuatında çalışan jurnalistlər üçün) qalib elan edilməsi nəzərdə tutulub. Lakin region KİV-də çalışan jurnalistlər tərəfindən cəmi 9 istiqamət üzrə yazı təqdim edilib. Məlumat üçün bildirilib ki, müsabiqənin qalibləri sırasına qatılmaq üçün minimum keçid balı 30 bal müəyyən edilib.

Müşahidə Şurasının qərarı ilə 50 jurnalist qalib hesab edilib. Qalan 4 yer isə həmin istiqamətlər üzrə yazı daxil olmadığından və ya yetərli bal toplanılmadığından boş qalıb. Qərara əsasən, qalib jurnalistlərin hər birinə 1000 manat pul vəsaiti və Fondun diploma təqdim olunacaq. Qaliblərin diplomları Fondun bu ilin 29 dekabr tarixində Gülüstan Sarayında keçirəcəyi tədbirdə təqdim ediləcək.

Müşahidə Şurasında KİV-in maddi texniki durumunu araşdırmaq məqsədilə yaradılmış komissiyanın məruzəsi dinlənilib. Komissiyanın rəyini nəzərə alan Müşahidə Şurası üzvləri, Fondun 2010-cu il üzrə büdcəsindən ölkədə tirajı, ictimai rəyə təsiri və stabil dövriyyəsi ilə tanınan 31 qəzet, 8 informasiya agentliyinə birdəfəlik yardımlar göstərilməsi barədə qərar qəbul edib. Qəzet redaksiyaları üçün 3500 manat, informasiya agentlikləri üçünsə 2500 manat birdəfəlik yardımın edilməsi barədə qərar verilib.

Qeyd edək ki, APA-nın əməkdaşı Rəşad Süleymanovun «Vətənpərvər media: tələb, yoxsa zərurət?» adlı yazısı «Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi» istiqaməti üzrə birinci yerə layiq görülüb.