Media

Ana səhifə

Media

Kütləvi İnformasiya Vasitələrinin İnkişafına Dövlət Dəstəyi Fondu Novruz bayramı münasibəti ilə jurnalist yazıları müsabiqəsi elan edib - FOTO

07 fevral 2011 16:37 (UTC +04:00)

Bakı. Laçın Sultanova – APA. Bu gün Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının iclası keçirilib. Fonddan APA-ya verilən məlumata görə, iclasda fondun 2010-cu il üçün həyata keçirdiyi tədbirlər və büdcədən ayrılmış vəsaitin xərclənməsi barədə hesabatın müzakirəsi, 2011-ci il üçün Fondun Fəaliyyət proqramının müzakirəsi, Novruz Bayramı münasibətilə keçiriləcək fərdi jurnalist yazıları müsabiqəsinin mövzularının müzakirəsi aparılıb, müvafiq qərarlar qəbul edilib.
Fondun icraçı direktoru Vüqar Səfərli 2010-cu il üçün həyata keçirilən tədbirlər və büdcədən ayrılmış vəsaitin xərclənməsi barədə məlumat verib. O bildirib ki, 2010-cu ildə dövlət büdcəsindən Fonda 2.301.558 manat vəsait ayrılıb, ayrılmış vəsaitin büdcədə nəzərdə tutulan istiqamətlər üzrə sərf olunması barədə sənədləri Müşahidə Şurası üzvlərinin diqqətinə çatdırıb. Ayrılmış vəsaitdən ümumilikdə 4.876 manat xərclənməmiş qalıb ki, bu da dövlət büdcəsinə keçirilib.
İkinci məsələ ilə bağlı çıxış edən Müşahidə Şurasının sədri Umud Rəhimoğlu bildirib ki, Fondun 2011-ci il üçün fəaliyyət proqramının hazırlanması məqsədilə Müşahidə Şurası üzvlərinə öncədən məlumat verilib, onların təklif və rəyləri toplanıb. Bütün təklif və rəylər nəzərə alınaraq Fondun 2011-ci il üçün fəaliyyət planı hazırlanıb. 2011-ci il üçün tədbirlər planı layihəsinin yaxın günlərdə yenidən müzakirə edilməsi qərara alınıb.
Sonda Novruz bayramı münasibətilə keçiriləcək fərdi jurnalist yazıları müsabiqəsinin mövzuları müzakirə edilib. V. Səfərli müsabiqənin maliyyələşmə imkanları barədə Müşahidə Şurası üzvlərinə məlumat verib. Fondun imkanlarını nəzərə alan Müşahidə Şurası üzvləri Novruz Bayramı münasibətilə keçiriləcək fərdi jurnalist yazıları müsabiqəsinin 7 istiqamət üzrə keçirilməsi barədə qərar qəbul edib.