Media

Ana səhifə

Media

Bakı Slavyan Universitetinin jurnalistika ixtisası üzrə təhsil alan tələbələri ilə media qurumlarının rəhbərləri arasında görüş keçirilib - FOTO

10 mart 2011 10:46 (UTC +04:00)

Bakı. Pərvin Abbasov – APA. Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşəbbüsü ilə Bakı Slavyan Universitetinin (BSU) jurnalistika ixtisası üzrə təhsil alan tələbələri ilə aparıcı mətbuat orqanlarının rəhbərləri arasında görüş keçirilib. APA-nın məlumatına görə, tədbirdə BSU-nun rektoru Kamal Abdulla, KİV-in İnkişafına Dövlət Dəstəyi Fondunun icraçı direktoru Vüqar Səfərli, Mətbuat Şurasının sədri Əflatun Amaşov, 40-a yaxın gündəlik və həftəlik qəzetin baş redaktoru iştirak edib.

BSU-nun rektoru Kamal Abdulla bildirib ki, tədbirin əsas məqsədi jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və onların gələcəkdə işlə təmin olunmaları üçün şərait yaratmaqdır. V. Səfərli tədbirin əhəmiyyətindən danışaraq deyib ki, BSU-nun jurnalistika ixtisası üzrə təhsil alan sonuncu kurs tələbələri beş aylıq təcrübə keçmək üçün qəzet redaksiyalarına göndəriləcək: “Gələcəkdə isə bacarıqlı tələbələr həmin redaksiyalarda işə düzələcəklər”.

V. Səfərli xatırladıb ki, jurnalistika ixtisası üzrə təhsil alan tələbələr əvvəllər də müxtəlif redaksiyalarda təcrübə keçiblər: “Lakin onların təxminən 90 faizi təcrübədə praktiki olaraq iştirak etmirdilər, sadəcə olaraq sənədlərin toplayıb universitetə təqdim edirdilər. Bu gün isə məqsədimiz jurnalistika ixtisası üzrə təhsil alan istedadlı gəncləri seçməkdən ibarətdir. Əgər tələbələr özlərini beş ay müddətində doğruldarsa, onlar işə götürüləcək. Onu da bildirim ki, təcrübə keçən tələbələrlə müvafiq redaksiyalar arasında müqavilə də bağlanır və onlara ayda 100 manat məvacib ödənilir”.

V. Səfərli analoji tədbirin fevralın 23-də Bakı Dövlət Universitetində (BDU) də keçirildiyini söyləyib. O qeyd edib ki, BDU-nun jurnalistika fakültəsinin 22 tələbəsi qəzet redaksiyalarında fəaliyyətə başlayıb: “Başqa ali təhsil müəssisələrindən də belə təklif olarsa, onları da dəstəkləyərik”.