Media

Media

Azərbaycan Mətbuat Şurasının Şikayətlər üzrə Komissiyasının iclası keçirilib

11 mart 2011 13:15 (UTC +04:00)

Bakı. Kəmalə Quliyeva – APA. Azərbaycan Mətbuat Şurasının (MŞ) Şikayətlər üzrə Komissiyasının iclası keçirilib. Şuradan APA-ya verilən məlumata görə, MŞ sədrinin müavini Müşfiq Ələsgərlinin başçılıq etdiyi komissiya beş məsələni müzakirə edib. İclasda əvvəlcə Şəki Şəhər Təhsil Şöbəsinin “Azərbaycan gündəmi” qəzeti ilə bağlı şikayətinə baxılıb. Bu mətbuat orqanında dərc edilən “Şəkinin Təhsil Şöbəsinin müdiri nazirlikdən gileylidir” sərlövhəli yazının peşə etikasının tələbləri gözlənilmədən səhifəyə çıxarıldığı vurğulanıb. Mətndə təkzibin tələblərinin gözlənilmədiyi, eyni zamanda məsələyə yanaşmada jurnalist fəaliyyəti ilə bir araya sığmayan məqamların mövcudluğu nəzərə alınaraq “Azərbaycan gündəmi” barədə araşdırmaların MŞ-nın “Reket jurnalistika”ya qarşı mübarizə Komissiyası tərəfindən davamı məqsədə uyğun sayılıb.

Şikayətlər üzrə Komissiyada Bakı Şəhər 9 saylı Uşaq Poliklinikasının və Bakı şəhər 171 saylı orta məktəbin “Ədalət carçısı” qəzeti ilə bağlı müraciətlərinin müzakirəsi zamanı sözügedən nəşrin fəaliyyətinin əsasını mətbu prinsiplərə zidd halların təşkil etdiyi aydınlaşıb. MŞ-nin qəzetlə bağlı yekun qərarı Şuranın “Reket jurnalistika”ya qarşı mübarizə Komissiyasının rəyindən asılı olacaq.

Komissiya Bakı şəhər 171 saylı orta məktəb barədə “Cəmiyyət” və “Bizim dövr” qəzetlərində gedən yazılarda da peşə prinsiplərinə sayğısızlıq göstərildiyi, “Cəmiyyət” qəzeti ilə bağlı sənədlərin “Reket jurnalistika”ya qarşı mübarizə Komissiyasına təqdim olunması qənaətinə gəlib. Komissiya son vaxtlar MŞ-yə “Bizim dövr” qəzeti barədə çoxsaylı şikayətlərin ünvanlanmasına xüsusi diqqət yetirib. Qəzetin adı Şuranın “qara siyahı”sında yer aldığına görə toplanmış sənədlərin inzibati orqanlara göndərilməsi üçün MŞ-nın İdarə Heyəti qarşısında məsələ qaldırılması məqsədə uyğun sayılıb.

İclasda Beyləqan rayonunun “Sirik” obasında məskunlaşan məcburi köçkün Firdovsi Abbasovun “Son olay” qəzetinin baş redaktoru Ramin Məhəmmədoğlu və redaktoru Ali Məhəmmədin peşə fəaliyyəti ilə bir araya sığmayan hərəkətləri barədə şikayətinin MŞ təmsilçisi tərəfindən araşdırılmasına dair arayış da müzakirə olunub. Təqdim edilən sənədlərdə hüquq-mühafizə orqanlarının araşdırılmalı olduğu məqamlar mövcud olduğundan “Son olay”la bağlı toplanmış materialların Beyləqan Rayon Prokurorluğuna göndərilməsi məqsədə uyğun sayılıb.