Media

Ana səhifə

Media

Azərbaycan Mətbuat Şurası və ATƏT-in Bakı Ofisi diffamasiya ilə bağlı tədbirlər keçirəcək

20 aprel 2011 12:49 (UTC +04:00)

Bakı-APA. Bu gün Azərbaycan Mətbuat Şurasının (MŞ) sədri Əflatun Amaşov ATƏT-in Bakı Ofisinin demokratiya şöbəsinin rəhbəri Jaklin Karpenterlə görüşüb. MŞ-dən APA-ya verilən məlumata görə, şurada baş tutan görüşdə əsas müzakirə mövzusu MŞ-nin ATƏT-in Bakı ofisi ilə birgə reallaşdırdığı layihə olub. Qeyd olunub ki, hər iki qurum 2011-ci ilin martından «Azərbaycan Jurnalistlərinin Peşə Davranışı Qaydaları»nın təkmilləşdirilməsi və diffamasiya haqqında qanunun qəbulunun sürətləndirilməsi ilə bağlı birgə layihə həyata keçirməkdədir. Ötən ilin sentyabrında layihənin birinci istiqaməti üzrə işlər tamamlanıb. Həmin vaxt Bakıda təşkil olunan beynəlxalq konfransda AJPDQ-nın yeni təkmilləşdirilmiş variantı ictimaiyyətə təqdim olunub.
MŞ sədri Əflatun Amaşov ötən il layihə çərçivəsində intensiv işlərin aparıldığını xatırladaraq bunun diffamasiya mühitinə hazırlıq baxımından əhəmiyyətliliyini önə çəkib. Diffamasiya haqqında qanunun qəbulu ilə bağlı görüləcək işlərin sürətləndirilməsinə ehtiyacın duyulduğunu deyən Şura sədri rəhbərlik etdiyi qurumun qanun layihəsi hazırladığını bildirib.
ATƏT-in Bakı ofisinin nümayəndəsi J.Karpenter diffamasiyaya dair məsələnin söz və mətbuat azadlığının dərinləşməsində vacib amil olduğunu qeyd edərək təmsil olunduğu təşkilatın qarşıdakı birgə fəaliyyətə böyük önəm verdiyini vurğulayıb.

Müzakirələrdən sonra bu il aprelin 26-da və mayın 5-də diffamasiya ilə bağlı iki dəyirmi masanın təşkili qərara alınıb. Tədbirlərdə məsələ ilə əlaqədar KİV-in, jurnalist birliklərinin təmsilçiləri və media ekspertlərinin iştirakı ilə geniş müzakirələrin aparılması məqbul sayılıb. Mayın 11-də isə Bakıda mövzuya dair ATƏT-in və MŞ-nin birgə təşkilatçılığı ilə beynəlxalq konfransın təşkili planlaşdırılıb. Həmin toplantıda ATƏT-in media azadlığı üzrə xüsusi nümayəndəsi Dunya Miyatoviçin, həmçinin xarici media ekspertlərinin və KİV təmsilçilərinin iştirakı nəzərdə tutulur.

ATƏT _ Mətbuat Şurası