Media

Ana səhifə

Media

Mətbuat Şurasında 3 may Dünya Mətbuat Azadlığı Gününə həsr olunmuş tədbir keçirib

03 may 2011 10:04 (UTC +04:00)

Bakı. Rəşad Süleymanov-APA. Bu gün Azərbaycan Mətbuat Şurasında 3 may Dünya Mətbuat Azadlığı Gününə həsr olunmuş tədbir keçirib. APA-nın məlumatına görə, tədbirdə çıxış edən Mətbuat Şurasının sədri Əflatun Amaşov bu günün tarixindən danışıb.

Tədbirin təşkilatçılarından UNESCO-nun Azərbaycan Milli Komitəsinin birinci katibi Günay Əfəndiyeva bildirib Ki, Azərbaycanda mətbuatın inkişafı prosesi gedir, dövlət başçısı tərəfindən bu sahəyə diqqət göstərilir. Bu sahədə gördüyü işlərə görə dövlət başçısı müxtəlif mükafatlara layiq görülüb.

G. Əfəndiyeva BMT-nin və UNESCO-nun Dünya Mətbuat Azadlığı Günü ilə bağlı müraciətini iştirakçıların diqqətinə çatdırıb. Müraciətdə bildirilir Ki, bu gün 20 il əvvəl bir qrup jurnalistlərin toplantısında təsis olunub: “20 il ərzində mediada çox dəyişikliklər baş verib. Bu gün dünyada informasiyaların alınmasına müəyyən təhdidlər olsa da bütün bunlar dəf olunur. Son 10 ildə 500-dən çox jurnalist peşə fəaliyyətini yerinə yetirərkən dünyasını dəyişib. 2010-cu ildə fəaliyyətini yerinə yetirərkən dünyasını dəyişən jurnalistlərin sayı 60-dan artıqdır”. Müraciətdə internet medianın, on-line medianın inkişafının BMT tərəfindən dəstəkləndiyi qeyd olunub.

Ə. Amaşov qeyd edib Ki, artıq müraciətdən göründüyü kimi BMT rəhbəri tərəfindən İnternet jurnalistikanın inkişafı diqqət mərkəzindədir. BMT baş katibi bununla bağlı dünya dövlətlərinin rəhbərlərinə müraciətlər ünvanlayıb.

Beynəlxalq Mətbuat İnstitutu (İPİ) Azərbaycan Milli Komitəsinin sədri, Beynəlxalq Avrasiya Mətbuat Fondunun (BAMF) rəhbəri Umud Rəhimoğlu isə çıxışında bildirib Ki, İPİ-nin statistikasına görə, son 10 ildə 788 jurnalist qətlə yetirilib. Bu hadisələrin əksəriyyəti Pakistan, Əfqanıstan kimi ölkələrlə yanaşı Honduras, Meksika kimi
ölkələrdə baş verib.

Azərbaycan Prezidenti yanında KİV-in İnkişafına Yardım Fondunun icraçı direktoru Vüqar Səfərli isə bildirib Ki, rəhbərlik etdiyi Fond tərəfindən jurnalistlərin peşəkarlığının artırılması üçün çoxlu treninqlər, yazı müsabiqələri keçirilib, qəzet redaksiyalarına maddi
yardımlar ayrılıb. Ötən il yazı müsabiqələrində 150 nəfər qalib olub və hər bir qalib 1000 manat mükafat alıb. Bu il Fondun büdcəsi artırılaraq 2 milyon 400 min manata çatdırılıb.

«Bizim Fond tərəfindən azad mətbuata nə qədər kömək lazımsa göstəriləcək», - deyə V. Səfərli vurğulayıb. V. Səfərli qeyd edib Ki, bu günə 4 mindən çox KİV qeydiyyatdan keçib. Amma bu gün Mətbuat Şurasının «qara siyahısı»nda olan qəzetlərin sayı gündəlik fəaliyyətdə olan qəzetlərin sayından çoxdur.

Tədbirdə «Ayna-Zerkalo» qəzetinin baş redaktoru Elçin Şıxlı, «Novaya Vremya» qəzetinin baş direktoru Şakir Ağayev, «Olaylar» qəzetinin baş redaktoru Yunus Oğuz və digər şəxslər çıxış ediblər.