Media

Ana səhifə

Media

ATƏT-in media azadlığı üzrə xüsusi nümayəndəsi Azərbaycan Mətbuat Şurasında olub

10 may 2011 16:57 (UTC +04:00)

Bakı - APA. Bu gün ATƏT-in media azadlığı üzrə xüsusi nümayəndəsi Dunya Miyatoviç Mətbuat Şurasında (MŞ) olub. MŞ-dan APA-ya verilən məlumata görə, görüşdə Azərbaycanda söz və mətbuat azadlığı sahəsində duruma, Şuranın ATƏT-in Bakı ofisi ilə birgə əməkdaşlığına dair fikir mübadilələri aparılıb.

MŞ sədri Əflatun Amaşov bildirib ki, rəhbəri olduğu qurum yarandığı gündən ölkədə söz və mətbuat azadlığı ilə bağlı prosesləri diqqətdə saxlayır. “Şuranın əsas missiyası media-ictimaiyyət, media-hakimiyyət münasibətlərinin tənzimlənməsindən, mövcud sahədə meydana çıxan çətinliklərin aradan qaldırılmasına kömək göstərməkdən ibarətdir. Başlıca fəaliyyətimiz cəmiyyət üzvlərinin KİV-lə bağlı şikayətlərini araşdırılmasından ibarətdir. Bununla yanaşı, medianın inkişafına yönələn təşəbbüslərlə çıxış edirik”, - deyə o vurğulayıb.

Diffamasiya ilə bağlı məsələnin müzakirəsində Ə.Amaşov bildirib ki, MŞ-nın məsələ ilə əlaqədar ATƏT-in Bakı ofisi ilə birgə layihəsi müsbət nəticələrini verməkdədir. O, layihənin ilk istiqamətinin uğurla yekunlaşdığını və “Azərbaycan Jurnalistlərinin Peşə Davranışı Qaydaları”nın təkmilləşdirildiyini diqqətə çatdırıb, diqqəti diffamasiya ilə bağlı qanun layihəsinin hazırlandığına yönəldib və bu istiqamətdəki müzakirələrə start verildiyini bildirib.

ATƏT-in media azadlığı üzrə xüsusi nümayəndəsi D.Miyatoviç Azərbaycanın ATƏT-lə əməkdaşlığında medianı önəmli faktor kimi önə çəkib. O, təmsil olunduğu qurumun ölkəmizdə söz və mətbuat azadlığına dair vəziyyəti daim diqqətdə saxladığını deyib. O, MŞ-nın ATƏT-in Bakı ofisi ilə birgə layihəsinin uğurlarına da toxunaraq diffamasiya ilə bağlı qanun layihəsi ilə tanış olduğunu bildirib: «Mən Sizə bu qanunun qəbulu üçün göstərdiyiniz səylərə görə təşəkkürümü bildirirəm. İyunda ATƏT-in Daimi Şurasının iclasında hesabatla çıxış edəcəm və bütün bunlar barədə məlumat verəcəm. Əlbəttə, həmin vaxtadək diffamasiya haqqında qanun qəbul edilsəydi, daha yaxşı olardı. Ümid edirəm ki, Azərbaycana növbəti gəlişimdə bu qanun artıq qəbul ediləcək».

Ə.Amaşov məlumat verib ki, diffamasiya ilə bağlı qanundan irəli gələrək Azərbaycanın bir çox qanunvericik aktlarına dəyişiklər labüddür və buna görə də məsələnin müxtəlif instansiyalarda daha ətraflı şəkildə müzakirəsinə ehtiyac duyulur.

Qeyd edək ki, görüşdə ATƏT-in Bakı ofisinin demokratiya şöbəsinin rəhbəri Jaklin Karpenter, MŞ sədrinin müavinləri, Beynəlxalq Avrasiya Mətbuat Fondunun sədri Umud Rəhimoğlu, Jurnalistlərin Həmkarlar İttifaqının sədri Müşfiq Ələsgərli və digər şəxslər iştirak ediblər.