Media

Media

“Media hüququ” kitabının təqdimatı keçirilib

16 may 2011 09:51 (UTC +04:00)

APA-nın məlumatına görə, MŞ sədri Əflatun Amaşov bildirib ki, kitab təmsil etdiyi qurumun səyi nəticəsində Azərbaycan dilinə tərcümə edilib.

Kitabın əhəmiyyətindən danışan müəllif, Minnesota Universitetinin professoru Ceyn Körtli jurnalist kimi fəaliyyətə başladığını, sonra isə hüquq dərəcəsi alaraq, vəkillik fəaliyyəti ilə məşğul olduğunu deyib. Jurnalistlərə hüquqi yardım edilməsinin əhəmiyyətindən danışan C. Körtli qeyd edib ki, nəşrdə dünya təcrübəsindən istifadə edilib, jurnalistin peşə fəaliyyətində rastlaşdığı bütün məqamlara toxunulub: “Bir çox ölkədə mətbuatla hökumət qurumları arasında gərginlik hökm sürür. Hüquq peşəkar jurnalistikanın bir hissəsidir. Mətbuatın inkişafının bir hissəsi də etik qaydalara riayət edilməsidir. Mən daxili tənzimləmənin tərəfdarıyam”. Yeni, qeyri-ənənəvi medianın inkişafının bəzi şəxsləri narahat etdiyini söyləyən C. Körtli bildirib, media qanunvericiliyinin hazırlanmasında əsas çətin məqam bu yeniliyi nəzərə almaq olacaq.

“Azərbaycan” qəzetinin baş redaktoru Bəxtiyar Sadıqov Azərbaycanda mətbuata yaradılan şəraitdən danışıb. O, yeni medianın qanunvericilik bazasının yaradılmasının vacibliyini də qeyd edib.

APA İnformasiya Agentliyinin baş direktoru Vüsalə Mahirqızı dünyada mətbuatın yeni mərhələyə qədəm qoyduğunu bildirib. Onun sözlərinə görə, bu gün Azərbaycan KİV-inin istinad etdiyi yeni medianı dünya da hələ yeni öyrənir: “Ümumiyyətlə bu məsələ ciddi müzakirə mövzusudur. Maraqlı məqamlardan biri odur ki, sosial şəbəkələr media hesab edilə bilərmi, bloqqerlər jurnalist sayılmalıdırlarmı? Bu baxımdan başqa ölkələrdən gələn rəy də maraqlıdır. Hər bir halda bu məsələlər qarşılıqlı təcrübə əsasında öyrənilməlidir”.

V. Mahirqızı Azərbaycanda media ilə bağlı yeni qanunvericilik bazasının yaradılması istiqamətində addımlar atıldığını da qeyd edib.

Tədbirdə iştirak edən MŞ üzvləri, jurnalistlər və ictimai təşkilatların nümayəndələri mövzu ilə bağlı fikirlərini söyləyiblər. Bundan başqa, C. Körtli ona ünvanlanan sualları da cavablandırıb.

Təqdimatda nəşrin müəllifi Ceyn Körtliyə MŞ-nın diplomu da təqdim edilib.