Media

Media

“Bakı-Xəbər” qəzeti yas mərasimləri ilə bağlı elan etdiyi müsabiqənin müddətini daha 3 ay uzadıb

18 may 2011 16:55 (UTC +04:00)

Bakı - APA. “Bakı-Xəbər” qəzeti bu il fevralın 20-də 3 aylıq müddətə “İslamda yas mərasimləri və əyintilər” mövzusunda elan etdiyi peşəkar və həvəskar yazarlar üçün müsabiqənin vaxtını daha 3 ay uzadıb.

Qəzetin redaksiyasından APA-ya verilən məlumata görə, müsabiqənin ilkin şərtlərinə əsasən mayın 20-də işçi qrup tərəfindən dərc olunmuş qəzet məqalələrinin toplanması bitməli, növbəti 10 gün müddətində, yəni mayın 30-dək ekspertlər qrupu yazıları dəyərləndirərək 1-ci, 2-ci və 3-cü yerlər üzrə müvafiq qalibləri müəyyənləşdirməli idi.

Bu gün müsabiqə üzrə işçi qrupun iclası keçirilib. İclasdan sonra açıqlama verən Aydın Quliyev bildirdbi ki, müsabiqəyə ictimaiyyət arasında getdikcə artan marağı nəzərə alaraq, müsabiqənin müddətini daha 3 ay, yəni avqustun 20-dək uzatmaq barədə qərar qəbul edilib: “İlkin mərhələdə mövzu üzrə 32 böyük həcmdə qəzet məqaləsinin çap olunması, bölgələrdən aldığımız 120-dən artıq məktub göstərir ki, biz əslində getdikcə güclənən bir prosesə başlamışıq. Əslində bu günə qədər təqdim edilmiş 32 böyük məqalənin özü də böyük göstəricidir və elə bununla da müsabiqəni yekunlaşdırmaq olardı. Biz başa düşürük ki, bundan sonra da təqdim ediləcək saysız məqalələr qələbə yerləri uğrunda rəqabəti daha da kəskinləşdirəcək. Açığı, bizə lazım olan hədəflərdən biri də elə budur. İndiyə qədər yazı təqdim etmiş jurnalist dostlarımıza və həvəskar yazarlara isə bir daha demək istəyirəm ki, onların təqdim etdiyi yazılara maksimum obyektiv yanaşılacağına kimsənin şübhəsi ola bilməz”.

Avqustun 30-dək - 10 gün müddətində ekspertlər yazılara rəy verəcək və qısa müddətdə təqdimat mərasimi keçiriləcək. Birinci yeri tutan 1000 manat, 2-ci yeri tutan iki qalibin hər biri 500 manat, 3-cü yeri tutan 3 qalibin hər biri 300 manat mükafat alacaq.