Media

Media

“İnformasiya əldə etmək azadlığı” mövzusunda məsləhətləşmə keçirilib

31 may 2011 11:07 (UTC +04:00)

APA-nın məlumatına görə, tədbirdə ombudsman Elmira Süleymanova, Prezident Administrasiyası və Milli Məclisin təmsilçiləri, baş redaktorlar, media ekspertləri iştirak edib. E. Süleymanova bildirib ki, bu, ilk məsləhətləşmədir və analoji tədbirlər davam etdiriləcək. O, Ombudsman Aparatı olaraq jurnalistlərlə münasibətləri yaxşı qurduqlarını deyib.

Çıxış edən Ombudsman Aparatının rəhbəri Aydın Səfixanlı “İnformasiya əldə etmək haqqında” qanunun tələblərinə nəzarətin həyata keçirilməsi üzrə ombudsmana verilən səlahiyyətlər haqqında məlumat verib. Ombudsman Aparatının mətbuat xidmətinin rəhbəri Zemfira Məhərrəmli isə təmsil olunduğu qurumun mətbuatla əlaqələri barədə danışıb. O bildirib ki, Azərbaycanda ombudsman təsisatı yarandığı vaxtdan indiyədək qurum haqqında mətbuatda 7800 məqalə və informasiya çap olunub, Ombudsman Aparatı isə 2400-dək press-reliz yayıb.

Azəri-Press Agentliyinin (APA) baş direktoru Vüsalə Mahirqızı bəzi dövlət qurumlarının mətbuat xidmətlərinin olmamasını problem kimi göstərib. O, “İnformasiya əldə etmək haqqında” qanunun tələblərinə nəzarətin həyata keçirilməsi üzrə səlahiyyətlərin ombudsmana verilməsini müsbət xarakterizə edərək əlavə edib ki, bu məsələdə jurnalistlərin də iştirakı vacibdir: “Çünki elə spesifik işlər olur ki, onu ən yaxşı jurnalistlər bilir”. E. Süleymanova isə müvafiq qanun qəbul olunduqdan sonra bu işə jurnalistlərin də cəlb olunacağını açıqlayıb.

Media Hüququ İnstitutunun direktoru Rəşid Hacılı dövlət qurumlarında “mətbuat xidməti” vəzifəsi ilə yanaşı, informasiya verən bir qurumun yaradılmasının da zəruri olduğunu qeyd edib. Onun sözlərinə görə, dövlət qurumlarında mətbuat xidmətinin rəhbəri vəzifəsini həyata keçirən şəxslər onlara verilən informasiya sorğusunda göstərilən sualların cavablarına malik olmurlar ki, cavab da verə bilsinlər.

Prezident Administrasiyasının siyasi şöbəsinin sektor müdiri Vüqar Əliyev isə növbəti məsləhətləşmə tədbirlərində vətəndaş cəmiyyəti institutları və dövlət qurumlarının nümayəndələrinin iştirakının təmin olunmasını tövsiyə edib: “İnformasiya sahiblərini də dinləmək lazımdır”.