Media

Ana səhifə

Media

“Ağsuda aparılan arxeoloji tədqiqatların ən yeni nəticələri” və “Şirvan xəzinəsinə aparan yollar” mədəni irs press turlarının təqdimatı olub

11 iyun 2011 20:31 (UTC +04:00)

Ağsu. Şahnəzər Bəşirov-APA. “MİRAS” Mədəni İrsin Öyrənilməsinə Kömək İctimai Birliyinin və Ağsu Arxeoloji Ekspedisiyası iyunun 11-də Ağsu şəhərində KİV nümayəndələri üçün “Ağsuda aparılan arxeoloji tədqiqatların ən yeni nəticələri” və “Şirvan xəzinəsinə aparan yollar” mədəni irs press turlarının təqdimatına həsr olunan mətbuat konfransı keçirib. APA-nın Şirvan bürosunun xəbərinə görə 30-a yaxın KİV nümayəndəsinin iştirak etdiyi tədbir iştirakçıları əvvəlcə “Şirvan xəzinəsinə aparan yollar” mədəni irs press turlarının marşrutuna daxil olan Qobustan şəhərindəki XV əsrə aid Diri Baba türbəsini ziyarət ediblər. Media nümayəndələri Şamaxı rayon Tarix Diyarşünaslıq Muzeyində, Ağsuda Heydər Əliyev seyrəngahında, orta əsr Ağsu şəhər yerində olublar. Jurnalistlər qədim Ağsu şəhərində aparılan arxeoloji qazıntılarla, bərpa və konservasiya işləri ilə tanış olublar.
Mətbuat konfransında Ağsu arxeoloji ekspedisiyasının rəisi, tarix elmləri doktoru, professor Qafar Cəbiyev Ağsuda aparılan arxeoloji tədqiqatların ən yeni nəticələri barədə məlumat verib. Qafar Cəbiyev Ağsuda aparılan arxeoloji qazıntıların Azərbaycanın xanlıqlar dövrü tarixinin bir sıra problemlərinin, xüsusilə də orta əsr şəhər mədəniyyəti probleminin dərindən və hərtərəfli araşdırılması üçün mühüm elmi əhəmiyyət kəsb etdiyini vurğulayıb. Ekspedisiya rəisi onu da qeyd edib ki, ötən ilin mart ayından başlayan tədqiqatlar nəticəsində orta əsr Ağsu şəhərində ümumilikdə 9000 kv.m-dək sahə öyrənilib, bu da öz miqyasına görə indiyədək Azərbaycanın qədim və orta əsr şəhərlərində aparılan ən geniş qazıntıdır. Ağsuda aparılan tədqiqatların çox mühüm özəlliklərindən biri odur ki, tədqiqatlar zamanı aşkar edilən zəngin maddi-mədəniyyət nümunələri Ağsuda və Bakıda keçirilən sərgilərlə geniş ictimaiyyətə təqdim olunub. Ağsu tədqiqatlarının materialları son zamanlar İtaliyada, İsraildə, İspaniyada, Türkiyədə beynəlxalq elmi konfrans və seminarlarda məruzə olunub.
“MİRAS” Mədəni İrsin Öyrənilməsinə Kömək İctimai Birliyinin sədri, tarix elmləri namizədi Fariz Xəlilli orta əsr Ağsu şəhəri tədqiqatlarının arxeoloji turizm layihəsi çərçivəsində aparıldığını, tədqiq olunan sahənin üzərinin örtüldüyünü, tikili və materialların konservasiya edildiyini, şəhərin üçölçülü variantının hazırlandığını brifinq iştirakçılarının nəzərinə çatdırıb. O, həmçinin qeyd edib ki, V qazıntı sahəsində aşkar edilən 700 kv.m-dək sahəsi olan, 56 sütundan ibarət məscid kompleksdə də yaxın zamanlarda konservasiya və bərpa işlərinə başlanılacaqdır. Arxeoloji turizmə dəstək olaraq MİRAS İctimai Birliyi Heritage Travel turizm şirkəti ilə birlikdə “Şirvan xəzinəsinə aparan yollar” mədəni irs press turlarına başlayıb və bugünkü tədbir də nəzərdə tutulan press turun başlanğıcıdır.
Sonda mədəni irsin təbliğində fərqlənən media təmsilçilərinə MİRAS İctimai Birliyinin dostu fəxri diplomları təqdim olunub.