Media

Ana səhifə

Media

Beynəlxalq Mətbuat İnstitutu: Bu il dünyada 51 jurnalist qətlə yetirilib

15 iyul 2011 12:17 (UTC +04:00)

BMİ-nin Azərbaycan Milli Komitəsinin rəhbəri Umud Rəhimoğlu APA-ya bildirib ki, hesabatda dünyada mətbuat azadlığının vəziyyətinin cüzi şəkildə yaxşılaşdığı, ənənəvi problemlərin hələ də qaldığı vurğulanıb. Hesabatda qeyd olunub ki, altı ay ərzində 51 jurnalist qətlə yetirilib. Ən çox jurnalist Latın Amerikasında (16 nəfər), Yaxın Şərqdə (21 nəfər) və İraqda (8 nəfər) öldürülüb.

Hesabatda bu ilki vəziyyət ötən illə müqayisə də edilib. Qeyd edilib ki, 2010-cu ilin ilk altı ayında 54 jurnalist qətlə yetirilib, il ərzində isə belə xoşagəlməz fakt 102 dəfə qeydə alınıb. 2010-cu ildə jurnalistika üçün ən təhlükəli ölkə Pakistan olub, burada 4 jurnalist vəzifə borcunu yerinə yetirərkən qətlə yetirilib.
Sənəddə Yaxın Şərqdə və Şimali Afrikada şərti olaraq “inqilab baharı” adlandırılan hadisələr zamanı kütləvi informasiya vasitələrinin vəziyyətindən də bəhs olunub. Bildirilib ki, bu regionda KİV-rə qarşı xüsusi repressiv siyasət aparılıb. Hökumət nümayəndələri, facebook və tvitter kimi müxtəlif sosial şəbəkələrinə əngəl yaradıb: “Belə məhdudiyyətlərin ən çox nəzərə çarpanı Suriyada xəbərlər proqramı zamanı işıqların söndürülməsi olub. Bu regionda fəaliyyət göstərən jurnalistlər milli təhlükəsizliyin qorunması və digər ittihamlarla hücum və təzyiqlərə məruz qalıb, həbs ediliblər.

Bundan başqa, Ekvatorial Qvineyada dövlət radiosu Liviya hadisələri barədə məlumat yaydığına görə, senzorlar tərəfindən təzyiqə məruz qalıb və yayımı dayandırılıb”. Qambiyadan olan jurnalistin BMİ-nin Vyana ofisinə göndərdiyi məlumata əsasən, qeyd edilib ki, Turanga FM radiosu sadəcə, beynəlxalq xəbərləri yerli dildə yayımladığına görə, efirdən kənarlaşdırılıb. Hesabatda Sudandakı hadisələr zamanı zorakılıqları işıqlandıran qəzetlərin nümunələrinin yığışdırıldığı, Çin Xalq Respublikasında media mənsubları təqiblərə və senzuraya məruz qaldığı, həbs olunduqları bildirilib.

Məlumata görə, sənəddə, həmçinin azərbaycanlı jurnalist Eynulla Fətullayevin may ayında həbsdən azad edilməsinə də toxunulub. Hesabatda Rusiyadan Balkanlara qədər jurnalistləri qətlə yetirən, zorakılıq törədən cinayətkarların cəzasız qaldığı qeyd olunub, o cümlədən Türkiyə və Belarus hakimiyyəti ciddi tənqid edilib.

BMİ-nin icraçı direktoru Alison Bethel dünyada jurnalistlərə qarşı törədilən qətl və zorakılıq faktlarından çox narahat olduqlarını deyib. O, narahatçılığını ifadə edərkən media azadlığının gələcəyindən də nigaran olduğunu vurğulayıb: “Faktlara əsaslanaraq demək olar ki, 2011-ci il mətbuat azadlığı üçün çox da yaxşı il olmayacaq”.

media _ qətllər _ BMİ