Media

Media

Standartlaşdırma, Metrologiya və Patent üzrə Dövlət Komitəsi bir qrup jurnalisti təltif edib - FOTO

Standartlaşdırma, Metrologiya və Patent üzrə Dövlət Komitəsi bir qrup jurnalisti təltif edib - <font color=red>FOTO</font>

22 iyul 2011 15:34 (UTC +04:00)

Bakı. Elnur Hüseynquluyev - APA-Economics. Bu gün Azərbaycan Standartlaşdırma, Metrologiya və Patent üzrə Dövlət Komitəsində (SMPDK) Milli Mətbuatın yaranmasının 136 illiyi münasibətilə tədbir keçirilib.

«APA-Economics»in məlumatına görə, tədbirdə SMPDK sədri Ramiz Həsənov Azərbaycan mətbuatının inkişafından və onun cəmiyyətdəki rolundan danışıb: “Demokratik inkişafın başlıca amillərindən sayılan azad mətbuatın formalaşması, inkişafı Azərbaycan dövlətinin siyasətinin tərkib hissəsidir. Vətəndaş cəmiyyəti quruculuğunda nailiyyətlər qazanmış ölkədə medianın sərbəst və dövlət hakimiyyətindən asılı olmayan fəaliyyətinin təmin edilməsi istiqamətində xeyli işlər görülüb və görülməkdədir. Azad medianın yaranması və inkişafı Heydər Əliyevin tarixi xidmətidir. Belə ki, 1995-ci ildə qəbul olunan Konstitusiyaya uyğun olaraq vətəndaşların qanuni yolla informasiya toplamaq, almaq, hazırlamaq, ötürmək və yaymaq hüququ dövlət təminatına əsaslandı”.

R.Həsənovun dediyinə görə, dövlət başçısının mediaya diqqət və qayğısının nəticəsidir ki, indi ölkədə yüzlərlə mətbuat orqanı, informasiya agentliyi, teleradio şirkətləri, sürətlə inkişaf edən internet portalları fəaliyyət göstərir: «Bu media vasitələri milli-mənəvi dəyərlərin qorunması, demokratiyanın inkişafı və geniş ictimaiyyət arasında yayılmasında mühüm missiya yerinə yetirir. Həmçinin onlar vətəndaş cəmiyyəti quruculuğunun fəal iştirakçısı kimi ölkə ictimaiyyətinin informasiyaya olan ehtiyacının ödənilməsində əhəmiyyətli rol oynayırlar».

Komitənin mətbuat xidməti sektorunun müdiri Fazil Talıblı isə çıxışında SMPDK-nin media işçiləri ilə daima sıx əməkdaşlıq etdiyini deyib. Onun sözlərinə görə, informasiya əldə etmək, məlumat azadlığı və KİV haqqında qanunların tələblərinə uyğun olaraq Komitənin fəaliyyəti haqqında gələn sorğular ən qısa müddətdə cavablandırılır: «Son bir ildə komitə sədri R.Həsənov bir neçə dəfə mətbuat konfransları keçirib, dəfələrlə müsahibələr verib və çıxışlar edib. Bundan başqa, struktur bölmə rəhbərləri sahələrinə uyğun olaraq mütəmadi televiziya kanallarındakı verilişlərdə, tok-şoularda, xəbərlər buraxılışlarında çıxış ediblər. Jurnalistlər Komitənin Ərazi Dövlət Nəzarəti idarələrinin həyata keçirdikləri dövlət nəzarəti tədbirlərində yaxından iştirak ediblər, təhlükəli, keyfiyyətsiz məhsullarla bağlı ictimaiyyəti operativ olaraq məlumatlandırıblar. Komitənin fəaliyyəti haqqında yazılı mətbuatda, qəzet və jurnallarda yüzlərlə məqalələr çap edilib».

Sonda R.Həsənov bir qrup jurnalisti Komitə ilə uğurlu əməkdaşlığına görə fəxri fərmanla təltif edib.

Qeyd edək ki, tədbirdə mükafat alanlar sırasında APA informasiya agentliyinin əməkdaşı da olub.