Media

Media

Mətbuat Şurasında Jurnalistlərin Beynəlxalq Həmrəylik Gününə həsr olunmuş dəyirmi masa keçirilib

08 sentyabr 2011 10:56 (UTC +04:00)

APA-nın məlumatına görə, tədbirdə çıxış edən Mətbuat Şurasının sədri Əflatun Amaşov bildirib ki, Jurnalistlərin Beynəlxalq Həmrəylik Günü 1958-ci ilin mayından qeyd edilir. Həmin il Buxarestdə keçirilən Beynəlxalq Jurnalistlər Təşkilatının IV Konqresində bununla bağlı qərar qəbul olunub. Dünya mediası üçün əlamətdar sayılan bu tarix 1943-cü il sentyabrın 8-də hitlerçilər tərəfindən qətlə yetirilmiş çexiyalı jurnalist Yulius Fuçikin xatirəsinə təsis edilib.

Çıxışında ölkədə medianın durumuna toxunan “Azərbaycan” qəzetinin baş redaktoru Bəxtiyar Sadıqov bildirib ki, mətbuat azadlığı son illər “reket” qəzetlərin sayının artmasına, heç bir savadı, ali təhsili olmayan redaktorların yaranmasına gətirib çıxarıb.

KİV-in İnkişafına Dövlət Dəstəyi Fondunun icraçı direktoru Vüqar Səfərli deyib ki, Azərbaycanda dövlət qeydiyyatından 4500 KİV keçsə də, hazırda 30-a yaxın gündəlik, 50-yə yaxın həftəlik qəzet olmaqla 300-ə yaxın KİV fəaliyyət göstərir.

BDU-nun jurnalistika fakültəsinin müəllimi Cahangir Məmmədli jurnalistləri tərəflərə, cəbhələrə bölünməməyə çağırıb.

“Monitor” jurnalının redaktoru Elmar Hüseynovun qətlinin üstünün açılması üçün şura adından hüquq-mühafizə orqanlarına təkrar müraciət olunmasını təklif edən “Yeni Müsavat” qəzetinin baş redaktoru Rauf Arifoğlu isə Mətbuat Şurasının fəaliyyətini sərt tənqid atəşinə tutub: “Biz şuranın üzvü olsaq da, onun mexanizmlərindən istifadə edə bilmirik. Tədbirlərə bir qrup şəxs gedir, bizi isə ya arabir çıxışa, ya da seçkiyə çağırırlar. Şura “reket” jurnalistlərə qarşı mübarizə apardığı qədər tənqidi jurnalistikanı da müdafiə etməlidir. Dövlət başçısı fond vasitəsilə “Azadlıq” və “Yeni Müsavat” qəzetlərinə yardım ayırır, amma burada bizi kənarda qoyurlar. Mən Mətbuat Şurasının üzvü olsam da, 6-7 ildir efir yasağı ilə üzləşmişəm. Niyə şura bununla maraqlanmır? Mən kimliyinə fərq qoyulmadan bütün redaktorları burada görmək istəyirəm”.

R. Arifoğlunun çıxışına yerdən V. Səfərli reaksiya verib. V. Səfərli Mətbuat Şurasının tədbirlərində “Yeni Müsavat” qəzetinin kommersiya direktorunun iştirak etdiyini söyləyib.

APA informasiya agentliyinin baş direktoru Vüsalə Mahirqızı isə bəyan edib ki, bu gün redaktorlar istənilən ad altında toplaşa və müzakirə apara bilərlər: “Ancaq bu gün Redaktorlar Birliyi adı altında toplaşmış bəzi adamlar var ki, onlarla bir masa arxasında oturmaq və onları tərəfdaş kimi qəbul etmək olmaz”.

V. Mahirqızı MŞ xətti ilə mətbuat xidmətləri ilə görüşlərin aktivləşdirilməsi, həmçinin strateji dövlət qurumlarının rəhbərləri ilə aparıcı KİV rəhbərlərinin medianın iştirakı olmadan görüşlərinin təşkili və müzakirələrin aparılmasını təklif edib.

mətbuat_şura