Media

Media

Mətbuat Şurasının Şikayətlər üzrə Komissiyasının iclası keçirilib - FOTO

Mətbuat Şurasının Şikayətlər üzrə Komissiyasının iclası keçirilib - <font color=red>FOTO</font>

16 sentyabr 2011 15:41 (UTC +04:00)

Bakı-APA. Azərbaycan Mətbuat Şurasının (MŞ) Şikayətlər üzrə Komissiyasının növbəti iclası keçirilib. MŞ-dən APA-ya verilən məlumata görə, iclasda müzakirələr şura sədrinin müavini, Jurnalistlərin Həmkarlar İttifaqının sədri Müşfiq Ələsgərlinin sədrliyi ilə aparılıb.
Əvvəlcə Şəki rayonundakı Turan qəsəbəsinin sakini Əbülfəz Hüseynov tərəfindən, həmçinin rayonun Bolludərə və Qarapapaq kəndlərinin sakinlərindən MŞ-yə «Korrupsiya və dövlətçilik» qəzeti ilə əlaqədar ünvanlanan şikayətlərə baxılıb. Komissiya narazılıq doğuran məqalənin etik prinsiplərin tələblərinin gözlənilmədən nəşrin səhifəsinə çıxarılmasını qəzetin baş redaktoru Osman Məmmədovun nəzərinə çatdırıb.
O. Məmmədov səslənən iradlarla razılaşıb. Qəzetə növbəti sayında qarşı tərəfin mövqeyini əks etdirən məktubunu vermək tövsiyə olunub.

Sonra «Fakt araşdırıcı» MMC-nin «Sahibkarlıq və hüquq» qəzeti ilə bağlı şikayəti araşdırılıb. Komissiya müəyyənləşdirib ki, qəzetdə qarşı tərəfə inamsızlığı təbliğ edən bildirişin yerləşdirilməsi heç də ictimaiyyətin real vəziyyətlə bağlı məlumatlandırılması məqsədindən qaynaqlanmayıb.
İclasda «Xural» qəzetində gedən materiallarla bağlı şikayətlər araşdırılmazdan öncə mətbu orqanın baş redaktoru Əvəz Zeynallının MŞ-yə ünvanladığı cavab məktubu oxunub. Ə. Zeynallı bildirib ki, «Xural» MŞ üzvü olmadığından şura bu KİV ilə əlaqədar şikayətlərə baxa bilməz. Lakin komissiya MŞ-nin ölkə jurnalistlərinin I qurultayında qəbul olunmuş Nizamnaməsinə, eləcə də «Mətbuat Şurasına şikayətlərin verilmə və onlara baxılma qaydaları»nın I bölməsinə istinadən belə iddianın əsassızlığı rəyinə gəlib.
Ə. Zeynallının qatılmadığı müzakirədə şikayətçilər - Lənkəran Dövlət Universitetinin, «Azərbaycan» Nəşriyyatının, Bilgəh Kardioloji Sanatoriyasının, Ağdam Rayon Prokurorluğunun və Sabirabad Rayon İcra Hakimiyyətinin təmsilçiləri dinlənilib. Həmçinin Bərdə Rayon İcra Hakimiyyəti tərəfindən “Xural” qəzetində gedən yazı ilə bağlı şikayət də araşdırılıb.
Komissiya yekdilliklə rəyə gəlib ki, şikayət doğuran materiallarda «Azərbaycan Jurnalistlərinin Peşə Davranışı Qaydaları»nın əksər bəndlərinə sayğısız yanaşılıb. Qəzet toxunduğu mövzularda qarşı tərəfin fikirlərini öyrənməyib. Qəzetdə, ümumiyyətlə, materialların təqdimat tərzi onun jurnalistikanın başlıca prinsiplərindən sayılan balansı və plüralizmi qorumaq niyyətindən xəbər vermir.
Komissiya belə səpkili yazıların təqdimatının «Xural»ın fəaliyyətində mütəmadi xarakter daşıdığını əsas götürərək qəzetin adının MŞ-nin «qara siyahı»sına salınması üçün nə kimi əsasların olduğu məsələsinə baxılmasının zəruriliyi rəyinə gəlib və nəşrlə əlaqədar toplanmış sənədlərin MŞ-nin «Reket jurnalistika»ya qarşı mübarizə Komissiyasında araşdırılmasını məqsədə müvafiq sayıb. Bu komissiyanın rəyindən sonra MŞ İdarə Heyəti tərəfindən məsələ ilə bağlı yekun qərar çıxarılacaq.

Mətbuat Şurası _ şikayətlər