Media

Ana səhifə

Media

Mətbuat Şurasının Şikayətlər üzrə Komissiyasının iclası keçirilib

04 noyabr 2011 15:15 (UTC +04:00)

Bakı-APA. Bu gün Azərbaycan Mətbuat Şurasının (MŞ) Şikayətlər ürzə Komissiyasının növbəti iclası keçirilib. Şuradan APA-ya verilən məlumata görə, MŞ sədrinin müavini, Jurnalistlərin Həmkarlar İttifaqının sədri Müşfiq Ələsgərlinin sədrliyi ilə keçirilən toplantıda yeddi məsələ ilə bağlı müraciətlər araşdırılıb. Öncə “Yeni axtarış” qəzetindən olan şikayətlərə baxılıb. Komissiya istər Ağdam Rayon Əhalinin Sosial Müdafiəsı Mərkəzi, istərsə də həmin bölgədəki Su Kanal İdarəsi barədə bu mətbu nəşrdə gedən yazılarda “Azərbaycan Jurnalistlərinin Peşə Davranışı Qaydaları”nın əksər bəndlərinin tələblərinə sayğısız yanaşıldığını müəyyənləşdirib. Rəyə gəlinib ki, qəzetin fəaliyyətində peşə prinsiplərinə zidd məqamlar üstünlük təşkil edir. Qeyd olunub ki, bütün bunlar məsələnin Şuranın “Reket jurnalitika”ya qarşı mübarizə Komissiyasında da araşdırılması zərurətini yaradır.
“Plolit press” qəzeti ilə bağlı məsləyə də “Reket jurnalitika”ya qarşı mübarizə Komissiyasında baxıldıqdan sonra MŞ-nin yekun qərarı çıxarılacaq. Bu mətbu orqanda da Salyan Rayon İcra Hakimiyyəti və Azərbaycan Müəllimlər İnstitutunun (AMİ) Qazax filialı barədə gedən yazılarda reket nəşrlərə xas dəst-xəttin üstünlük təşkil etdiyi qənaətinə gəlinib. İclasda “7gun.az” xəbər portalının baş redaktoru Cavid Şirəliyev etiraf edib ki, AMİ-nin Qazax filialı və Saatlı Rayon İcra Hakimiyyəti barədə verilən materialların təqdimatından əvvəl heç də dolğun araşdırmalar aparılmayıb. Yazılarda balans prinsipi gözlənilməyib. Komissiya xəbər portalının fəaliyyətində dönüş yaradılmasını zəruri hesab edib. Bununla yanaşı, “7gun.az” xəbər portalına MŞ-nin xəbərdarlığının edilməsi məqsədə müvafiq sayılıb. Cavabdeh tərəfə şikayətçilərdən üzr istənilməsi, təkzib verilməsi, həmçinin narazılıq doğuran materialların saytdan çıxardılması tövsiyə olunub.
Azərbaycanlıların və Digər Türkdilli Xalqların Əməkdaşlıq Mərkəzinin “Poliqon” İnformasiya Agentliyinin yayımladığı materialla bağlı müraciətinin müzakirəsi zamanı şikayət doğuran yazıda etik prinsiplərin aşkar şəkildə pozulduğu agentliyin baş redaktoru Azər Qaramanlının nəzərinə çatdırıb.
Qeyd olunub ki, “Unikal” qəzeti əməkdaşının rüşvət tələbetmə ittihamı ilə inzibati orqanlar tərəfindən cinayət məsuliyyətinə cəlb olunması məsələsi də iclasın müzakirə mövzusuna çevrilib. Komissiya üzvləri bu cür halları ümumilikdə medianın nüfuzuna xələl gətirən hərəkətlər kimi səciyyələndiriblər. Bütün bunlar qəzetin baş redaktoru Asəf Rzayevin nəzərinə çatdırılıb. Ondan tələb edilib ki, redaksiyada sağlam mühitin formalaşdırılması üçün köklü tədbirlər həyata keçirsin.
Komissiya MŞ Katibliyinə tapşırıb ki, “Unikal” qəzetinin yeni çıxacaq bir aylıq sayının monitorinqini aparsın və yekunu barədə məlumat təqdim etsin.
İclasda qəzetin məsələsinə istintaq yekunlaşandan sonra yenidən qayıdılması məqsədə uyğun sayılıb.

MŞ _ Şikayətlər Komissiyası