Media

Ana səhifə

Media

Mətbuat Şurasında dəyirmi masa keçirilib

18 noyabr 2011 12:41 (UTC +04:00)

Bakı. Ramil Məmmədli-APA. Azərbaycan Mətbuat Şurasında “Azərbaycan jurnalistlərinin qlobal iqlim dəyişikliyi sahəsində peşəkarlığının artırılması məqsədilə təlim proqramının hazırlanması” layihəsi çərçivəsində dəyirmi masa keçirilib.

APA-nın məlumatına görə, Mətbuat Şurasının sədri Əflatun Amaşov deyib ki, layihə təmsil etdiyi qurumla UNESCO-nun Moskva ofisi ilə birgə müqaviləsinə əsasən Kommunikasiyanın İnkişafı üzrə Beynəlxalq Proqram (KİBP) çərçivəsində reallaşıb: “Təhsil Nazirliyi, Mətbuat Şurası, UNESKO üzrə Azərbaycan Respublikası Milli Komissiyası, UNESKO-nun Azərbaycan Milli MaB - İnsan və Biosfer Komitəsi və Beynəlxalq Avrasiya Mətbuat Fondunun ekspert dəstəyi ilə hazırlanmış proqram kifayət qədər dolğun, müasir təhsil və jurnalistika standartları ilə uzlaşdırılıb”. Ə. Amaşov sənədin geniş ictimai müzakirəsinin təşkilinin bu ayın sonuna kimi həyata keçiriləcəyini də bildirib.

Akademik Urxan Ələkbərov bu problemlə bağlı mətbuatın rolunun əhəmiyyətini vurğulayıb. O deyib ki, 100 il əvvəl dünyada 1 milyard əhali olduğu halda, hazırda bu rəqəm 7 milyarda çatıb: “Bununla da qlobal ekoloji problemlər əmələ gəlir. Problemlər əsasən çox zaman insan fəaliyyəti nəticəsində baş verir. Bu da insanların məlumatsızlığı nəticəsindədir: “İqlim dəyişikliyi ilə bağlı fənnin jurnalistika fakültəsində tədrisinə çalışırıq. Bununla da jurnalistlərin bu istiqamət üzrə bilik və bacarıqlarının təkmilləşdirilməsinə öz töhfəmizi vermək niyyətindəyik”.

Yeni ekoloji sivilizasiya haqda danışan akademik onu da qeyd edib ki, bu termin ilk dəfə Azərbaycanda səslənib və bu termin beynəlxalq standartlara uyğunlaşdırılıb. Onun sözlərinə görə, yaxın gələcəkdə dünyada böyük proseslər baş verəcək və bununla da dünya dəyişəcək.

Sonra tədbir qarşılıqlı fikir mübadiləsi ilə davam etdirilib.

Qeyd edək ki, «Azərbaycan jurnalistlərinin qlobal iqlim dəyişikliyi sahəsində peşəkarlığının artırılması məqsədilə təlim proqramının hazırlanması» layihəsi bu ilin avqustun 1-dən reallaşdırılır. UNESKO-nun dəstəyi ilə icra olunan layihənin rəhbəri Azərbaycan Mətbuat Şurası (AMŞ), icraçı tərəfdaşlar isə YUNESKO-nun Azərbaycan Milli MaB (İnsan və Biosfer) Komitəsi və Beynəlxalq Avrasiya Mətbuat Fondudur.