Media

Ana səhifə

Media

Elçin Mirzəbəyli: “Biz ədalət prinsiplərinin qorunmasında, Azərbaycan cəmiyyətinə və oxucuya münasibətdə ədalətliyik” - MÜSAHİBƏ

Elçin Mirzəbəyli: “Biz ədalət prinsiplərinin qorunmasında, Azərbaycan cəmiyyətinə və oxucuya münasibətdə ədalətliyik” - <font color=red>MÜSAHİBƏ</font>

18 noyabr 2011 14:08 (UTC +04:00)

- Qəzetin nəşrə başlamasından 10 il keçdi. Bu müddətdə qəzet üzərinə götürdüyü missiyanı yerinə yetirə bilibmi?
- Qəzetin fəaliyyətə başladığı ilk gündən nəşrin vahid prinsipləri olub, konkret və həmin dövr üçün yeni, hətta bir çoxlarının qəbul etmədiyi və savaş açdığı prinsiplərlə - ideyalarla çıxıb. Bu, Azərbaycan cəmiyyətində sivil və konstruktiv dünyagörüşün təbliğ olunması, milli ideoloji xəttin fundamental səviyyədə cəmiyyətə təqdim olunması idi. Bu prinsipləri ilk gündən indiyə qədər qoruyub saxlamışıq və hesab edirəm ki, cəmiyyətə də çatdırmağa bacarmışıq. Çünki “Xalq cəbhəsi”nin qoyduğu dəsti-xəttə uyğun daha sonralar nəinki mətbuat orqanları, hətta siyasi partiyalar da formalaşıb.

- Rəhbərlik etdiyiniz qəzetin adında da bir məsuliyyət duyulur. Bu adı qəzet çərçivəsində yaşatmaq nə dərəcədə mümkün olub?
- Əslində, SSRİ-nin süquta uğradığı ərəfədə təkcə xalq cəbhələri yox, həmrəylik hərəkatları da yaranmağa başlanmışdı. Bu hərəkatların əksəriyyətinin əsasında sol ideyalar dayanırdı. Yəni xalqçılıq ideyaları dayandırdı. Ancaq Azərbaycanda bu hərəkat milli anlayış oldu. Adı xalq cəbhəsi olsa da, milli cəbhə oldu və Azərbaycan Xalq Cəbhəsinin dövlət müstəqilliyinin qazanılmasında kifayət qədər böyük xidmətləri oldu. Bu gün “Xalq cəbhəsi” qəzetinin əsasını qoyanlar da məhz, AXC-nin fəal üzvləri, həmçinin tələbə hərəkatının fəalları olublar. Daha sonralar isə bu siyasi təşkilatla bu və ya digər şəkildə bağlı olan insanlar olublar. Yəni “Xalq cəbhəsi” bu insanlar üçün bir doğma ad və ocaq olub. Mənə gəldikdə isə milli azadlıq hərəkatının marşının müəllifiyəm. Bu mənada da prosesin iştirakçısıyam və mənim üçün də bu ad doğmadır.

- Qəzetlərin siyasiləşməsi ilə bağlı çox danışılır. “Xalq cəbhəsi” qəzeti müstəqilliyini nə dərəcədə saxlaya bilib?
- Müstəqil media anlayışı Azərbaycanda fərqli şəkildə qəbul edilir. Qeyd edim ki, bütövlükdə siyasətdən kənar bir kimsə və mövzu da yoxdur. İstənilən sahə və istiqamət yeri gələndə siyasi mübarizənin predmetinə çevrilir. Jurnalistin, qəzetin və istənilən KİV rəhbərinin də siyasi mövqeyi var. Bu baxışlar istər-istəməz özünü müəyyən dərəcədə büruzə verir. Qənaətimə görə, əsas şərt ədalət prinsipini itirməməkdir. Təbii ki, “Xalq cəbhəsi” qəzeti Bütöv Azərbaycan Xalq Cəbhəsi Partiyası ilə eyni ideyaları bölüşən bir mətbuat orqanıdır. Ancaq qəzetin səhifələrinə diqqət yetirsəniz, Azərbaycanın bütün siyasi palitrasını görmək olar. Bir çox məsələlərdə, xüsusən də milli maraqlarımızda biz özünü müstəqil elan edən qəzetlərin çoxundan daha müstəqil görünürük. Əgər müstəqillik bir nəfər haqqında şantaj və böhtan xarakterli yazılar manşetə çıxartmaqdırsa, hansısa dairənin marağını ifadə etməkdirsə, bütün bunlardan sonra həmin şəxslərin fəaliyyətinə söykənərək mətbuat orqanı nəşr etdirməkdirsə, o zaman biz müstəqil deyilik. Yəni müstəqilliyin meyarları ilə atılan addımlar üst-üstə düşməlidir. Biz ədalət prinsiplərinin qorunmasında, Azərbaycan cəmiyyətinə və oxucuya münasibətdə ədalətliyik. Mənim üçün ədalət ən böyük müstəqillikdir.

- Qəzetin hazırkı tirajı sizi qane edirmi?
- Bu gizli bir şey deyil. Amma alıcılıq qabiliyyəti də qaneedici deyil. Yəni qəzetin tirajının azlığı məsələsini mətbuat orqanının üzərinə qoymaq olmaz. Bunun bir çox səbəbləri var. Buraya oxucu aktivliyi ilə yanaşı bölgələrə qəzetlərin çatdırılması problemini də əlavə etmək olar.

- Dünya inkişaf etdikcə, mətbuat sektoru da inkişaf edir. Qəzet müasir texnologiyaların imkanlarından hansı səviyyədə istifadə etmək niyyətindədir?
- Qəzetin saytı fəaliyyət göstərsə də, yüksək səviyyədə olduğunu deməzdim. Artıq bir müddətdir ki, daha müasir internet səhifəmizin hazırlanması istiqamətində işlər gedir. Yəqin ki, yaxın vaxtlarda proses başa çatacaq. Əlbəttə, çalışırdıq ki, 10 illik yubileyimizə qədər veb-səhifəni təqdim edək. Lakin müəyyən səbəblərdən bu, baş tutmadı. Bu səhifə bir portal kimi fəaliyyət göstərməyəcək, sadəcə internet qəzet funksiyasını yerinə yetirəcək. Onlayın rejimdə fəaliyyət göstərməyəcək. İnternet qəzet ənənəsi Azərbaycanda tam təşəkkül tapmayıb. Bir məqamı da diqqətinizə çatdırmaq istərdim – bu sözləri çap mediasında çalışdığıma görə demirəm. Əslində elektron mətbuat mənə daha yaxındır. Çünki əvvəllər televiziyada çalışmışam. Ancaq məsələyə başqa müstəvidən yanaşanda, çap mediasının gələcəkdə süquta uğrayacağını gözləmirəm. İnternet bumu bir müddət davam edə bilər. Lakin çap mediası da özünün fərqli obrazını qazanacaq. Bu prosesin zaman keçdikcə tənzimlənəcəyini gözləyirəm.

- Qəzetin yubileyini necə qeyd edəcəksiniz?
- Fərqli bir təqdimat olmayacaq. Qəzetdə fəaliyyət göstərən, əməkdaşlıq edən dostlarımızın iştirakı ilə toplantımız olacaq. Səmimi dost məclisi keçirəcəyik.