Media

Media

Bakıda «Yeni media: kadr təminatı və peşəkarlıq» mövzusunda konfrans keçirilib

22 noyabr 2011 12:47 (UTC +04:00)

Bakı. Elnur Hüseynquluyev - APA-Economics. Bu gün Bakıda Multimedia Mərkəzinin «Yeni media: kadr təminatı və peşəkarlıq» mövzusunda konfransı keçirilib.

«APA-Economics»in məlumatına görə, tədbiri giriş sözü ilə açan Multimedia Mərkəzinin rəhbəri Osman Gündüz ölkədə yeni medianın sürətli inkişaf etdiyi bir məqamda adı çəkilən mövzunun kifayət qədər önəmli olduğunu bildirib. O, yeni media mütəxəssislərinin hazırlanması istiqamətində peşəkar müzakirələrə ciddi ehtiyac olduğunu qeyd edib.

Mətbuat Şurasının sədri Əflatun Amaşov artıq ölkədə internet-medianın bir infrastruktur olaraq formalaşdığını və insanların informasiya münasibətlərində yeni media subyektlərinin mühüm yeri olduğunu qeyd edib. O, yeni medianın inkişafına ciddi diqqət yetirilməsinin vacibliyini vurğulayıb, bu istiqamətdə atılan addımları dəstəklədiyini və bu sahənin son dövrlərdə Mətbuat Şurasının da nəzərində olduğunu qeyd edib.

Daha sonra O.Gündüz «Yeni medianın vəziyyəti və peşəkarlıq», Bakı Dövlət Universitetinin “Jurnalistikanın nəzəriyyəsi və təcrübəsi” kafedrasının müəllimi Könül Niftəliyeva «Jurnalistika təhsilində yeni medianın yeri» mövzularında təqdimatlar ediblər. Təqdimatlarda bütövlükdə yeni medianın mövcud vəziyyəti, problemlər və onların aradan qaldırılması ilə bağlı təklif və tövsiyələr öz əksini tapıb. Ölkədə dinamik inkişaf edən yeni media sektorunun hazırda əsas problemlərindən birinin də kadr təminatı ilə bağlı olduğu qeyd edilib. Problemin aradan qaldırılması üçün ali təhsil müəssisələrində yeni tədris modelinin yaradılmasının vacibliyi, universitetlərdə tələbələrin praktiki bacarıqlar əldə etməsi üçün şəraitin yaradılması, onlayn laboratoriyaların təşkil edilməsi, tədris və biznes sektorunun əməkdaşlığının zəruriliyi və digər təkliflər irəli sürülüb.

Konfransın yekununda irəli sürülən təklif və tövsiyələrin ümumiləşdirilərək yeni medianın tədris modelinin hazırlanmasında istifadə ediləcəyi qeyd olunub. Gələn ilin əvvəlində yeni medianın tədris modeli layihəsinin müzakirəyə çıxarılacağı bildirilib.

Qeyd edək ki, konfransda internet-media qurumları və jurnalistika təhsili verən ali təhsil müəssisələrinin nümayəndələri, yeni media texnologiyaları sahəsində çalışanlar, dövlət qurumları və beynəlxalq təşkilatların nümayəndələri iştirak edib.